விகடகவி

ஹச்சூம்!!.... ச்சூம்!!

2009-04-26T21:42:00.000-07:00

சளி பிடிச்சிக்கறது நமக்கு சகஜந்தான். ஆனா, அந்த சளிக்குப் பின்னாடி இருக்குற சூத்திரதாரிய, மனுஷன் கண்டு பிடிச்சது சாதரணமான விஷயமில்லை. அதுல ஒரு சுவாரசியமான கதை இருக்கு.

பாஸ்ச்சர் தன்னோட GermTheory -க்குப் பிறகு, வெறிநாய்க்கடி நோய் (Rabies) எந்தக் கிருமியால வருதுன்னு கண்டுபிடிச்சுடலாமுன்னு நம்பிக்கையா இருந்தார். ஆனா, ஒரு வருஷமில்ல ரெண்டு வருஷமில்ல, பத்து வருஷம் கழிச்சும் அந்த வியாதிக்குப் பின்னாடி இருக்கும் கிருமிய அவரால கண்டு பிடிக்க முடியல. கடசியில, அவரும் முயற்சிய கைவிட்டுடறார்.

சில வருஷங்கள் கழிச்சு, ரஷியாவுல தாவரவியல் அறிஞர் இவானாவ்ஸ்கி (Ivanovsky) ந்னு ஒருத்தருக்கு "புகையிலைத் தேமல் நோய்" (tobacco mosaic disease) மேல ஒரு மோகம் வருது. அதென்னப்பா சில செடிகள் மட்டும் இந்த வியாதியால அவதிப்படுதுன்னு அவர் ஆராய்ச்சி பண்ணிட்டிருக்குறார். ஏதாவது bacteria-வா இருக்குமோன்னு சூப்பர்-டூப்பர் ஃபில்டர் எல்லாம் போட்டு bacteria-வ பிடிக்க பாக்குறாரு. அவரோட யுத்தி இது தான். நோய்வாய்ப்பட்ட செடிய பிழிஞ்சு, அந்த சாற்றுல இருக்குற கிருமிய ஃபில்டர் செஞ்சுடறார். பின்ன அந்த ஃபில்டெர் செஞ்ச சுத்தமான சாற எடுத்து ஆரோக்கியமான செடிகள் மேல தெளிக்குறார். தெளிச்சவுடனே, இந்த செடிகளும் நோயால அவதிப் படுதுங்க! ஆக ஏதோ ஒரு கிருமி மட்டும் ஃபில்டர டபாய்ச்சுடுது.

வெறி நாய் கடிச்சா நமக்குத் தூக்கம் வராது, இவருக்கோ புகையிலைத் தேமல் நோய் கிருமிய கண்டுபிடிக்காம தூக்கம் வரல! பல வருஷங்கள் கடந்து போகுது. இவ்வளவு நாள் தூக்கத்த கெடுக்க முடியுமோ? முடியாது. ஆக, ஃபில்டருல தாம்ப்பா பிரச்னைன்னு முடிவு பண்ணிட்டு இவரும் ஆராய்ச்சிய கை விட்டுடறார். (அதுக்கப்புறம் தூங்கினாறா இல்லையான்னு தெரியாது)

இவனாவ்ஸ்கி கைவிட்டதுக்குக் காரணம் உண்டு. பாக்டீரியாவையும் விட நுண்ணுயிர்கள் இருக்குதுன்னு அவர் காலத்துல யாருக்கும் தெரியாது. அஞ்சு வருஷம் கழிச்சு, ஹாலந்து நாட்டுல பெய்ஜெரினிக்(Beijerinick) ந்னு ஒரு தாவரவியல் அறிஞர் வர்றார். இவனாவ்ஸ்கி விட்டத இவரு தொடருறார். இவரு பரிசோதனை செய்யும் போதும், அதே விடைகள் தான் கெடைக்குது. பல தடவ முயற்சி செஞ்சும், அதே விடைகள் கெடச்சதும், இவரு என்ன பண்ணினார்? முயற்சிய கைவிடாம, ஃபில்டர்கள குறை சொல்லாம, ஒரு அறிக்கை விட்டார். பாக்டீரியாவையும் விட சின்னதா ஏதோ கிருமிகள் இருக்கனும், அத (virus)வைரஸ் (லத்தீனில் விஷம்!) ந்னு சொல்லுவோம்-கிறதுதான் அந்த அறிக்கை.

வெறிநாய்க்கடி வியாதிய ஆராய்ஞ்சா, உயிருக்கு உத்தரவாதம் ஏது? இந்த ரெண்டு தாவரவியல் அறிஞர்களும், செடிய ஆராய்ச்சி பண்ணினதால எப்படியோ வைரஸ்-கண்டுபிடிப்பு வரை வந்துட்டாங்கன்னு நெனைக்கறேன்.

ஆனா, இதுக்கப்புறமும் அறிவியல் உலகத்துல உடனே ஆர்வம் அதிகமாயிடல. கால்நடைகளுக்கு வரும் குளம்புவாய் நோய்(foot-and-mouth disease) பத்தி ஜெர்மனியில ஒருத்தர் ஆராய்ச்சி பண்ணி, இதுவும் இன்னொரு வைரஸ் தாம்ப்பான்னு சொல்றார். அடுத்த வருஷம், அமெரிக்காவுல வால்டர் ரீட் (Walter Reed) ங்குறவர், அப்போ பல உயிர்கள குடிச்ச கொசுக்கடி வியாதி "மஞ்சள் காய்ச்சல்"(yellow fever) உம் பாக்டீரியாவையும் விட சின்னதா இருக்கும் இன்னொரு வைரஸோட வேல தான், அப்படீன்றார்.

இதுக்கப்புறந்தான் , பாஸ்ச்சர் கண்டுபிடிச்ச பாக்டீரியாவையும் விட 1000 மடங்கு சின்னதா நுண்ணுயிர்கள் இருக்குதுன்னு, அறிவியல் உலகம் ஏத்துக்கிச்சு. இதுனால மருத்துவத் துறையும் பல வியாதிகள ஆராய்ஞ்சு முன்னேற்றம் அடஞ்சுது. "ஹச்சூம்!!.... ச்சூம்!!" ந்னு நாம தும்முறதும் கூட, வைரஸோட சித்து வேலைகள் தான்னு தெரிய வந்தது.

-விகடகவி

சத்யஜித் ரே - ஆட்ரி ஹெப்பர்ன்

2009-04-20T00:57:00.000-07:00

(ரே மட்டும் தான் பேசப் போகிறார். ஆனாலும், ஆட்ரி ஹெப்பர்ன், மதர் தெரெஸா, மொஸார்ட், ஷேக்ஸ்பியர் பெயரெல்லாம் தலை தூக்குகிறது இந்த நிகழ்வில்)

1992 March 30.

மொஸார்ட்டின் இருநூறாவது அஞ்சலிக்காக ஒரு வானொலி நிகழ்ச்சியில் சத்யஜித் ரே மும்முரமாக இருந்த காலம். இந்த நிகழ்ச்சிக்குப்பின் எடுக்கவிருக்கும் திரைப்படத்திற்கான (The Broken Journey) திரைக்கதையை எழுதிக் கொண்டிருக்கிறார் ரே. அப்போது, ஆஸ்கர் விருது இவருக்கு வழங்க முடிவு செய்திருப்பதாக செய்தி வருகிறது. இச்செய்தி, ரே உட்பட, பலருக்கும் மகிழ்ச்சியை வரவழைத்தது. அதோடு, இந்திய அரசாங்கத்தை ஒரு தர்ம சங்கடத்தில் நெளிய வைத்தது! :-) அவசர அவசரமாக, சத்யஜித் ரே-க்கு பாரத் ரத்னா விருது அறிவிக்கப்பட்டது. மேலும், இது ஏற்கனவே ஆஸ்கர் அறிவிப்பிற்கும் முன்னதாகவே முடிவு செய்யப்பட்டதாகவும் அறிக்கைகள் வந்தன. ஆனால் ரே-விற்கோ வேறு பிரச்னை. அவரது அடுத்தப் பட ஷூட்டிங் போக முடியாமல், நோயில் அவர் படுத்த படுக்கையாகி விடுகிறார்.

வழக்கமாக, நேரில் வர இயலாதவரின் சார்பாக, ஆஸ்கர் வாங்குவதற்கு பிரதிநிதி ஒருவரை அழைப்பது வழக்கம். ஆனால் அதற்குப் பதிலாக, கல்கத்தா மருத்துவமனைக்கு நேரில் வந்து ஆஸ்கர் வழங்குவதற்கு பிரதிநிதியைத் தேடியது ஆஸ்கர் குழு! (மதர் தெரெஸாவை அனுகி அவர் மறுத்து விட்டதாக ஒரு புரளி நிலவுகிறது) ரே-யின் அபிமான நடிகை ஆட்ரி ஹெப்பர்ன். சந்தேகமென்ன? அவரே நேரில் வந்து ஆஸ்கர் வழங்குவதற்கு தேர்வு செய்யப்படுகிறார். ஹெப்பர்ன் கடிதம் மூலம் தொடர்பு கொண்டு, "சத்யஜித் ரே" பெயரின் சரியான உச்சரிப்பு என்னவென்று கேட்டுத் தெரிந்து கொள்கிறார். மருத்துவமனையில் ஹெப்பர்ன் வழங்க, ரே பெற்று கொள்ளும் ஆஸ்கர், மார்ச் 30-ஆம் தேதி லாஸ் ஏஞ்சல்ஸில் நடக்கும் விழா மூலம் தொலைக்காட்சியில் ஒளிபரப்பாகிறது. ஆஸ்கரை வாங்கியதும், அது மிகவும் கனமாக இருப்பதை முதலில் சொல்கிறார். (தூக்கிப் பார்த்தவர்களுக்கே இது தெரியும்! :-) )

ரே பேசியது:
"இந்த விருதை என் சினிமா வாழ்வில் ஒரு சாதனையாகவே கருதுகிறேன். சிறு வயதில், பள்ளியில் படிக்கும்போதே எனக்கு சினிமா மேல் ஆர்வம் இருந்தது. Deanna Durbin-க்குக் கடிதம் எழுதி பதில் வந்ததும் பூரித்துப் போனேன். Ginger Rogers-க்கு எழுதினேன், ஹா! பதிலில்லை (சிரிக்கிறார்) பின்னர், சினிமாவை ஒரு கலைப்படைப்பாக பார்க்கத் தொடங்கியதும், Double Indemnity படம் பார்த்து, Billy Wilder-க்கு 12-பக்கத்திற்குக் கடிதம் எழுதினேன். அவரும் பதில் எழுதவில்லை. இதோ, எல்லோரும் இருக்கிறீர்கள்! சினிமா என்னும் கலையில் நான் கற்றுக்கொண்டதெல்லாம் அமெரிக்க திரைப்படங்களின் தயாரிப்பைப் பார்த்து தான். ..."

மூன்று வாரம் கழித்து, ஷேக்ஸ்பியர் காலமான அதே ஏப்ரல் 23-ஆம் தேதி, மருத்துவமனையில் சத்யஜித் ரே உயிர் துறக்கிறார். மறு நாள், மதசடங்குகளின்றி ரேயின் உடல் தகனம் செய்யப்படுகிறது.

-விகடகவி

பி.கு: ரே தொடங்கிய திரைக்கதையை வைத்து, The Broken Journey திரைப்படத்தை அவரது மகன் படைப்பார்.

கிருமிகள் கண்டேன் - லுயீ பாஸ்ச்சர் (Louis Pasteur)

2009-04-19T11:41:00.000-07:00

இது பாஸ்சரின் கதை.

1856 ஆம் ஆண்டு, 38 வயது பாஸ்ச்சர் (Paris) பாரிசில் ஒரு புகழ் பெற்ற அறிவியல் அமைப்பின் மேலாளராக பணிபுரிகிறார். பெருமைக்குரிய பதவியில் இருந்தும், அவர் தினம் தினம் ஆராய்ச்சி செய்ய இயலாததால் ரொம்பவே கடுப்பில் இருக்கிறார்! அந்த காலத்தில் அறிவியல் உலகில் பேசப்பட்டு வந்த ஒரு புதிர் அவரை ஈர்த்தது. நுண்ணுயிர்களின்(bacteria) பூர்வீகம் என்ன என்பதே அந்த புதிர்.

உயிரற்ற கரிமப் பொருட்களில் இருந்து, நுண்ணுயிர்கள் தானாக, மாஜிக் போல, உருவாகிவிடுகிறது என்று பல அறிவியலார்கள் நினைத்து வந்தனர். அது நிரூபிக்கப்படவில்லை, ஆனால் அப்படி ஒரு கருத்து நிலவியது. பாஸ்சருக்கு இதில் உடன்பாடு இல்லை என்பது மட்டுமில்லை, அவருக்கு இது தமாஷாக இருந்தது. ஆனால், திடீரென்று ஒரு நாள், பௌசே (Felix Pouchet) என்பவர் இதை நிரூபிப்பதாக ஒரு ஆராய்ச்சிக் கட்டுரை எழுதியதும், பாஸ்சர் பொறுமை இழந்து விடுகிறார். இனியும் வேடிக்கைப் பார்த்துக்கொண்டிருந்தால் சரிப்படாது என்று தீர்மானம் செய்து, ஆய்வுக்கூடத்திற்கே சென்று விடுகிறார்.

சரி, பாஸ்சரின் அனுமானம் என்ன? தயிர் புளிக்கும் போது, அதில் ஈஸ்ட் (yeast) என்னும் நுண்ணுயிரின் பங்கு என்ன என்பதை ஏற்கனவே இவர் உலகிற்கு அறிமுகப்படுத்தியிருந்தார். நுண்ணுயிர்கள் (bacteria) எங்கிருந்து வருகின்றன என்ற கேள்விக்கு இவரின் பதில் ரொம்ப எளிது. எப்போதுமே காற்றிலும், நீரிலும் நுண்ணுயிர்கள் பரவியிருக்கின்றன என்பதே பாஸ்சரின் பதில். ஆனால், நிரூபிக்கனுமே? அதற்கு இப்போது நேரம் வந்து விட்டது.

ஒரு கண்ணாடிக் குடுவையை சூடேற்றி(sterilize) கிருமிகளை அகற்றுகிறார். குடுவையின் ஒரு வாயை பஞ்சை வைத்து அடைத்து விடுகிறார். மறுவாயின் மூலம் ஒரு vacuum pump வைத்து காற்றை உறிஞ்சுகிறார். 24 மணி நேரம் கழித்து பஞ்சை வெறித்துப் பார்த்தால் புரிகிறது. உட்புறம் சுத்தமாகவும், வெளியில் கிருமிகளின் விளையாட்டால் நிறம் மாறிவிடுகிறது பஞ்சு. விஷயம் இதோடு முடிந்து விட வில்லை. மாஜிக் போல, தானாக கிருமிகள் உருவாவதில்லை என்று நிரூபிக்க வேண்டுமே?!

இந்த முறை குடுவையை சூட வைக்கும்போது, கிருமிகள் எளிதில் வளருவதற்கு ஏதுவான உணவுப் பொருட்களை உள்ளே போட்டு சுட வைக்கிறார். கிருமிகள் இல்லாமல் sterilize செய்ததும், நன்றாக குடுவையின் வாயை அடைத்து விடுகிறார். 24 மணி நேரம் ஆனது. 2 மாதங்களும் கடந்தது. ஆனால், தினம் தினம் குறிப்பெடுத்ததில், குடுவையின் உள்ளே எந்த கிருமியும் தோன்றவில்லை! குடுவையின் வாயைத் திறந்து விடுகிறார். அடுத்த 8 மணி நேரத்திலேயே, கிருமிகள் உணவுப் பொருட்களின் மேல் இனப்பெருக்கம் செய்து விடுகின்றன.

பெளசேயின் கோட்பாடு தவறு. பாஸ்சரின் கூற்றே சரி. இதில் முக்கியமான விஷயம் என்னவென்றால், இந்த கண்டுபிடிப்பிற்குப்பின் "நுண்ணுயிரியில்" என்ற தனித்துறையே உருவாகியது. இதன் பின்னரே வியாதியும்/நோயும் பற்றி ஆழமான புரிதல்கள் நமக்கு உருவாகியது. இந்த கண்டுபிடிப்பு "Germ Theory" என்று மருத்துவ வரலாற்றில் பதிவு செய்யப் பட்டுள்ளது. பாஸ்சருக்கு நன்றி!

-விகடகவி

(Charles Darwin)சார்லஸ் டார்வினுக்கு (Crick)க்ரிக் கொடுத்த கிளிஞ்சல்

2009-01-25T18:00:00.000-08:00

இதுவரை உலகம் கண்ட அறிவியலார்கள் பட்டியலில், மிக மிக உச்சத்தில் இருப்பவர் சார்லஸ் டார்வின். மேலும், (DNA) டி-என்-ஏ புகழ் க்ரிக்[*] அறிவியல் உலகம் போற்றும் பெரியவர்களில் ஒருவர்.

இந்த ரெண்டு பேரும் சம காலத்தில் வாழ்ந்தவர்கள் இல்லையே, க்ரிக்கிடம் இருந்து டார்வின் என்ன வாங்கினார்... இதென்ன டுபாகூர் அப்படீன்றீங்களா? டுபாகூர் இல்லை, நிஜம்.

சாகறதுக்கு ரெண்டு வாரம் முன்னாடி, டார்வின் ஒரு (Beetle)வண்டின் காலில் ஒட்டிக் கொண்டிருந்த கிளிஞ்சலைப் பத்தி அறிவியல் கட்டுரை எழுதினார். அவரின் கடைசி கட்டுரை அது. அந்த வண்டை அவருக்கு அனுப்பியவர் (Walter Crick)வால்டர் க்ரிக் என்பவர். இவர் அறிவியல் ஆர்வம் கொண்டு, ஆனாலும் செருப்பு தைத்து வாழ்க்கையை ஓட்டிக் கொண்டிருந்தவர். அவரும் கல்யாணம் பண்ணி, ஹேரி (Harry) என்று ஒரு பிள்ளையைப் பெத்து வளர்த்தார். அந்த ஹேரியின் பிள்ளை (Francis)ஃப்ரான்ஸிஸ் தான் [*] DNA என்னும் அடிப்படை உண்மையைக் கண்டு பிடித்தார்.

டார்வினுக்கு, தாத்தா க்ரிக் கிளிஞ்சல் கொடுத்தார். பேரப் பிள்ளை என்ன கொடுத்தார்?

DNA என்னும் கண்டுபிடிப்புக்கு முன் வரையிலும், டார்வின் கோட்பாடுகளும் ஜெனெடிக்ஸ் (Genetics) என்னும் துறையும் இறுக்கமாக இணையவில்லை என்றே சொல்லலாம். DNA கண்டுபிடிப்புக்குப் பின்னரே, கோட்பாடுகள்(theory) என்பதைத் தாண்டி நடப்பு/உண்மை (fact) என்று, டார்வின் சொன்ன கருத்துக்கள் இன்னும் ஆழமாக ஊர்ஜிதமானது.

ஆக, பேரப்பிள்ளை டார்வினுக்கு நிரூபனம் கொடுத்தார் என்று சொல்லலாமா?

ரெண்டு சுவாரசியமான உதாரணங்கள் பார்க்கலாம்.

ஏன் விக்கல்?

மனுஷன் குரங்கிலிருந்து வந்தான், குரங்கு எதிலிருந்து வந்தது... இப்படியே பின்னோக்கிச் சென்றால், அனைத்து உயிரினங்களுமே நீர்வாழ் உயிரினத்திடமிருந்தே தோன்றியதாகக் கருதப்படுகிறது. ஆக, மீன்கள் கூட நம்முடைய மூதாதையர்கள் தான். நீரிலிருந்து நிலத்துக்கு மாறிய கட்டத்தில் உருவாகிய தவளையைப் பார்த்தால், அது விக்கலின் மூலம், நமக்கே நம்மைப் பற்றி கதை சொல்லி புரிய வைக்கிறது. அதாவது....

நமக்கு ஏன் விக்கல் வருகிறது (விக்கலின் தோற்றம்) என்பது ஒரு புரியாத புதிர். விக்கல் என்பது நம் விருப்பமின்றி தானாக (involuntary) நிகழ்வது. வேகமாக உள்மூச்சு வாங்கி, அதே சமயம் தொண்டையில் இருக்கும் (epiglotiss என்னும்)திசு ஒன்று மூடிக்கொள்வதால் வரும் விளைவே விக்கல். இந்த விக்கலின்றி நாம் உயிர் வாழலாம். சந்தோஷமாகவே வாழலாம்! சரி, தவளை என்ன சொல்கிறது?

குஞ்சுக்கு முந்திய நிலையில் (tadpole) இருக்கும் போது, தவளைக்கு நுரையீரலும் இருக்கும், செதிலும் இருக்கும். நுரையீரலில் வெறும் காத்து தான் போகும் (போகனும்), செதிலில் தண்ணி தான் போகும் (போகனும்). இது இப்படியிருக்க, தண்ணியில் இருக்கும் தவளைக்குஞ்சு எப்படி வாய் வழியே உள்ளிழுத்தத் தண்ணீரை, தொண்டை வழியே செலுத்தி, (நீரை நுரையீரலுக்கு அனுப்பாமல்!) பின்னர் செதில் மூலம் வெளியேற்றும்? நுரையீரலுக்குள் நீர் போகாமல் தடுப்பது, தவளைக்கும் அதே (glottis எனும்) திசுதான்! அதாவது, தவளைக்குஞ்சு தண்ணீருக்குள் உள்மூச்சு வாங்கும்போது, திசுவால் நுரையீரல் வாயிலை அடைத்துக் கொண்டு, பெரும் விக்கல் செய்து கொண்டிருக்கிறது! நாம் தவளையாக இருந்தபோது போடப்பட்ட அந்த பரிணாமக் கையெழுத்து தான், நம்மை இன்னும் பாடு படுத்திக் கொண்டிருக்கிறது, என்று அறிவியலார்கள் கணிக்கிறார்கள்.

இதையும் விட துல்லியமான உதாரணம், ஜெனெடிக்ஸ் துறையிலிருந்து பார்க்கலாம்.

தென்னமெரிக்காவில் (finch) சிறிய பறவைகளைப் படித்த டார்வின், அவைகளின் அலகுகள் எப்படி இறுக்கமானதாக பரிணாம வளர்ச்சி அடைந்திருக்கக்கூடும் என்று சொல்லியிருந்தார். தடித்த கொட்டைகளையும், விதைகளையும் உடைத்து உண்ண ஏதுவாக ஒரு இனத்திலிருந்து, இறுக்கமான தாடையுடன் இன்னொரு இனம் வளர்ந்திருக்கலாம் என்பது அவரின் கூற்று.

பின்னர், ஆப்பிரிக்காவின் ஏரிகளில் மீன்களைப் படித்த அறிவியலார்கள், தங்கள் சுற்றுச் சூழலுக்கேற்ப மீன் வகைகள் வளர்ச்சி அடைந்திருப்பதைப் படித்தார்கள். தாவரங்களை உண்ணும் (cichlid)கிக்லிட் மீன்கள் மென்மையான தாடை கொண்டதாகவும், நத்தைகளை உடைத்து உண்ணும் (cichlid) கிக்லிட் மீன்கள் இறுக்கமான தாடைகளுடனும் பரிணாம வளர்ச்சி அடைந்திருப்பதை கண்டு பிடித்தார்கள். சரி, இதில் என்ன துல்லியம் என்கிறீர்களா? சமீபத்தில், DNA டெக்னாலஜியுடன் ஆராய்ந்த அறிவியலார்கள் தென்னமெரிக்க சிறு பறவைகளிலும், ஆப்பிரிக்க மீன்களிலும் இறுக்கமான தாடைகளை உருவாக்கும் ஜீன் (for protein BMP4) வெவ்வேறு அல்ல, ஒன்றே தான் என்று உறுதியாகச் சொல்லிவிட்டார்கள்.

அனைத்து உயிரினங்களுக்கும் ஆழமான அடிப்படை பரிணாமத்தொடர்பு இருக்கிறது என்று சொல்லிச் சென்ற சார்லஸ் டார்வின் இதைக் கேட்டால் குஷியடைவார் தானே? (வால்டரின்) பேரப்பிள்ளை க்ரிக்-கிற்கு நன்றி!!

-------------

* - வாட்சனுடன் இணைந்து

ஒபாமா செதுக்கிய பாதை (தொகுப்பு)

2008-11-16T00:28:00.000-08:00

ஒபாமா செதுக்கிய பாதை (தொகுப்பு)
Choice 2008 என்னும் PBS documentary-யின் ஒபாமா பகுதியின் தொகுப்பையே ஒரு தொடராக முன்பு பதிவு செய்தேன்.

(மேலே உள்ள வீடியோ முடிந்ததும், (2 of 7), (3 of 7), ... என்று அடுத்தடுத்த வீடியோக்களை சொடுக்கிப் பார்க்கவும்)

PBS இணையதளத்தில் முழு வீடியோவும் கிடைக்கும்.
விலைக்கு வாங்க இங்கே சொடுக்கவும்.
இணையத்திலேயே பார்க்க இங்கே சொடுக்கவும்.

ஒபாமா செதுக்கிய பாதை (பாகம் 7)

2008-11-06T01:17:00.001-08:00

ஒபாமா - மெக்கேன்

இப்போதுதான் Rev. Wright பற்றிய குட்டை மறுபடியும் கிளறப்பட்டது. நிஜத்தை எதிர் கொள்ள வேண்டிய சூழல். ஒபாமாவுக்கு அடுத்தவர் speech எழுதிக் கொடுப்பதில்லை. அவரே Wright ப்ரச்னையை திறந்த மனதுடன் எதிர் கொண்டு பேசி, ஒரு முற்றுப் புள்ளி வைத்தார். தான் ஒரு ”ஆத்திரம் கொண்ட அரசியல்வாதி இல்லை” என்பதை மக்கள் நம்ப வேண்டும். தன் கட்சி மக்களின் நம்பிக்கையை இறுதியில் வென்றார். Democratic party-இன் பிரதிநிதியாக ஒபாமாவும், அவரின் துணை-அதிபராக ஜோ பைடனும் 2008 தேர்தலில் போட்டியிட இறங்கினார்கள். அவர்களை எதிர்த்து ஜான் மெக்கேனும், சாரா பேலினும்.

இந்த போட்டி இன்னொரு முக்கியமான ஜனநாயக நிகழ்வு.

அதன் விடை 4 November 2008 அன்று சரித்திரமாகியது.

(முற்றும்)

ஒபாமா செதுக்கிய பாதை (பாகம் 6)

2008-11-06T00:47:00.001-08:00

ஆஹா! அது நடக்கலாம்!

Iowa... ஐயோவா... Iowa.

அதிபர் தேர்தலில் போட்டியிட, தங்கள் கட்சி மக்களிடம் முதலில் நிரூபிக்க வேண்டும். அதன் பின் தான், கட்சிக்குப் பிரதிநிதியாக தேர்தலில் இறங்க முடியும். அந்தப் போட்டியில் முக்கியமான மாநிலம் “Iowa.” ஏன்?

அங்கே Hillary Clinton-க்கும் ஒபாமாவுக்கும் கடும் போட்டி. க்ளிண்டன் பலம் படைத்தவர். ஒபாமா நேற்று முளைத்தவர். இந்தப் போட்டி கடுமையான உரசலாக உருமாறியது. ஒபாமாவோ, தன் ஈராக் போரெதிர்ப்பு கொள்கையின் தெளிவையும், அதன் மூலம் நடுத்தர வெள்ளையர்களின் ஆதரவையும் குறித்தே மக்களிடம் பேசினார். இறுதியில், Hillary-ஐ எதிர்த்த முக்கியமான வெற்றி Iowa-வில் கிடைத்தது. இந்த வெற்றியின் முக்கியம், வெள்ளையர்களின் ஆதரவு என்பதே!

90% மேலான வெள்ளையர்கள் உள்ள Iowaவில் வெற்றி பெற அதிக சாமர்த்தியம் வேண்டும். இந்த வெற்றியின் ரகசியம், grassroots movement இல் இவருக்கு இருந்த நம்பிக்கையும் செயல்திறனும் தான். ஒபாமா, நம் காந்திஜியின் அபிமானி என்பதை இங்கு நினைவில் கொள்ள வேண்டும். சராசரி மக்கள் கறுப்பு/வெள்ளை பார்ப்பதில்லை. தங்களின் வாழ்க்கையின் அன்றாட ப்ரச்னைகள் பற்றியே கவலைப் படுகிறார்கள். அவர்களை ஓட்டுச் சாவடிக்கு வர வைத்து விட்டால், வெற்றி வாய்ப்பு அதிகம் என்பதை நிருப்பித்த மாநிலம் Iowa. இந்தக் கட்டத்தில் தான், பெரும்பான்மையான மக்கள் “ஆஹா! சரித்திரம் உருவாகலாம்!!” என்று ஒபாமாவைப் பார்த்து நிஜமாகவே அசர ஆரம்பித்தார்கள்.

ஒபாமாவும் ஹில்லரிக்கும் நடந்த வாதங்களில் Bill Clinton-ஐயும் எதிர் கொண்டார் ஒபாமா. தன் கட்சியின் அதிபர் பிரதிநிதியாக வெற்றி பெறவே இவ்வளவு போராட்டமும் நடத்த வேண்டியிருந்தது. Republican கட்சியை எதிர்த்து நடக்கவிருக்கும் நிஜப் போராட்டமே இன்னும் தொடங்கவில்லை!

ஒபாமா செதுக்கிய பாதை (பாகம் 5)

2008-11-06T00:30:00.000-08:00

”ஆம், நம்மால் முடியும்”

4 வருடம் கழித்து 2004-இல் Senator-ஆகிறார். “Yes we can" "நம்மால் முடியும்” என்ற கோஷத்தை மக்கள் மனதில் பதிக்கிறார்.

இப்படியாக, 2007-இல் குடும்பத்துடன் கலந்தாலோசித்து அமெரிக்க அதிபர் போட்டியில் பங்கேற்க முடிவு செய்கிறார். இதனிடையில், ஒபாமாவின் நண்பர் Rev. Wright என்பவரால் ப்ரச்னை கிளம்புகிறது. Wright-இன், அமெரிக்காவில் இனவெறி எதிர்த்து கோபமான extreme ப்ரசங்கங்களால், அரசியல் இடையூறுகள் வருமென்பதை உணர்ந்து, போட்டியிடுவதை அறிவித்தபோது Wright-ஐ அழைக்காமல் விட்டு விடுகிறார். முழுமையாக முடிக்காமல், தற்காலிகமாக ஒதுக்கி விடுவதால், இப்பிரச்னை பின்னால் இவரை வாட்டும்.

ஒபாமா செதுக்கிய பாதை (பாகம் 4)

2008-11-05T23:56:00.001-08:00

”காலம் இன்னும் கனியவில்லை”

2006 அமைதியாகக் கடக்கிறது.

மற்ற அரசியல் தலைவர்களின் நம்பிக்கையை சம்பாதித்த ஒபாமா, அவர்களின் உறவையும் சம்பாதிக்கிறார். 2008 அமெரிக்க அதிபர் தேர்தலுக்கு அமெரிக்கா ஆயத்தமாகிறது. ஒபாமாவின் கூர்மையான சிந்தனை, அவரை Tom Daschle இடம் இட்டுச் செல்கிறது. யதார்த்தமான அறிவுறை Tom-இடமிருந்து கிடைக்கிறது.
”காலந்தாழ்த்தாதே. அரசியல் வாழ்வில், தாமதிக்கும் ஒவ்வொரு வாய்ப்பும், அடுத்தவர்களுக்கு குட்டையைக் கிளறும் சந்தர்ப்பம் அளிப்பதாக அமையும்.” மேலும் சிலரிடம் ஆலோசனைக் கேட்கிறார், ஆனால் வித்தியாசமான பதில்கள் கிடைக்கிறது. அமெரிக்கா கறுப்பு அதிபருக்கு இன்னும் தயாரில்லை, காலம் கனியவில்லை என்ற பதில்கள். ஒபாமா ஏற்க மறுக்கிறார்! ”இப்போ கனியவில்லையென்றால் எப்போ கனியும்?” என்று கேட்கிறார்.

ஆலோசனையில் மட்டும் இதை அவர் நேர்கொள்ளவில்லை. முன்பு அரசியல் வாய்ப்பிலும் இதை அவர் எதிர்கொண்டவர் தான். முதன் முதலில் State Senator போட்டிக்கு ஒரு இடம் கிடைத்து அந்த போட்டியில் நுழைந்த போது அது நடந்தது. போட்டிக்குத் தயாரான பின்பு, அடுத்தவர் வார்த்தை மாறியதால், அந்த வாய்ப்பு இறுதி நேரத்தில் நழுவும் தருவாயில், மறுபடியும் சில மூத்தவர்களின் அறிவுறை கேட்க நேரிட்டது. அப்போதும் அதே அறிவுறைகள். “உனக்கு காலம் வரும். காத்திரு!”

“இல்லை, இது தான் என் காலம்” என்பதே அவரின் பதில். அதுமட்டுமல்ல, அந்த போட்டியில், இறுதியில் அவர் தேர்தலில் எதிர்ப்பில்லாமல் வெற்றி பெற்றார்!

இன்னும் கொஞ்சம் பின்னால் சென்றால், 2000-இல் Congressional seat க்கு முயற்சி செய்த போது, Bobby Rush என்ற மூத்தவரிடம் தோற்க நேர்ந்தது. Conservative வெள்ளையர்கள், இவரை கறுப்பனென்பதால் சந்தேகித்தார்கள். கறுப்பர்களோ இவரை “மெத்தப் படித்தவன்” என்று சந்தேகித்தார்கள். கறுப்பு/வெள்ளை கலப்புக் குடும்பத்தில் பிறந்தவனின் வழக்கமான ப்ரச்னைகளை எதிர்கொண்டார். Bill Clinton இன் ஆதரவு மூத்தவர் Bobby Rush-க்கு கிடைத்ததும் இவரது தோல்விக்கு குறிப்பிடத்தக்க காரணம்.

ஒபாமா செதுக்கிய பாதை (பாகம் 3)

2008-11-05T23:37:00.001-08:00

கலப்பினம் பலவீனமல்ல. அது பலம்!!

அக்காலத்தில் Harvard Law School-இல் கறுப்பர்களின் வாழ்க்கை சுலபமானதாக இல்லை. இனத்தின் மேல் வெறுப்பும், கடுப்பும் சகஜம். குறிப்பாக, இன்றைய இந்தியாவில் Reservation காரணத்தால் இருக்கும் மனக்கசப்பும், துவேஷமும் போல், அன்று அமெரிக்காவில் affirmative action காரணமாக கசப்பும்/துவேஷமும் இருந்தது. ஆனால், தனது கறுப்பு/வெள்ளை கலந்த குடும்பப் பிண்ணனியில் கற்றுக் கொண்ட நிறைய விஷயங்கள், இவருள் இருந்த தலைவனை வெளிக் கொணர்ந்தது. கொள்கைப் பிடிவாதங்களால் பிரிந்து கிடந்தவர்களின் வேற்றுமையை நீக்கி, இணக்கம் கொண்டு வர முயன்றார். Conservative வெள்ளையர்களிடம் இவருக்கு நல்ல உறவு முறை இருந்தது. Harvard Law Review-வின் தேர்தலில் President-ஆக போட்டியிட முடிவு செய்து, முதல் கறுப்பர் என்று வெற்றி பெற்று சரித்திரம் படைக்கிறார். வெற்றியை தன்னடக்கத்துடன் ஏற்றுக் கொண்ட போதிலும், கறுப்பர்களிடமும் வெள்ளையர்களிடமும் வருத்தத்தை சம்பாதிக்க நேர்கிறது. எப்படி முடிவு எடுத்தாலும், எப்படி பொறுப்புக்களைப் பிரித்துக் கொடுத்தாலும், இரண்டு கூட்டத்திலும் வருத்தப் பட ஆளிருக்கத்தானே செய்யும்!

தனக்கு இருந்த கறுப்பு/வெள்ளை கலந்த சந்ததியை பலவீனமாக்க உலகம் முயன்ற போது, அதன் நிஜ பலத்தை உலகுக்கு உணர்த்தினார்.

ஒபாமா செதுக்கிய பாதை (பாகம் 2)

2008-11-05T23:11:00.000-08:00

”இன்னும் பெரிய அளவில் சாதிக்கனும்”

ஜனவரி 2005. ஐந்து மாதங்கள் கடந்து Senate-க்குப் போகிறார் ஒபாமா. அங்கே பலரின் நற்பெயரை சம்பாதித்ததுடன், மூத்த தலைவர் Tom Daschle-ஐ ஒபாமா தனக்கு குருவாக தேர்வு செய்து கொள்கிறார். ஒபாமாவின் திறமையும் தெளிவும் பலர் கண்ணில் படுகிறது. தன் பலத்தை சில்லறை விஷயங்களில் விரயம் செய்யாமல், 2 வருடங்களில் தன்னை ஒரு உயர்மட்ட நிலைக்கு உயர்த்த முடிவு செய்து கொள்கிறார் ஒபாமா. இந்நேரத்தில் Senate பற்றி நிறைய கற்றுக் கொள்கிறார். மூத்தவர்களின் நடுவில் ஜாக்கிரதையாக நடந்து கொள்கிறார்.

அரசியலில் அதிக கவனம் செலுத்தியது போல், முதலிலிருந்தே ஒபாமா சமூகத்திலும் அக்கறை செலுத்தினார். 1984-இல், 23 வயதில் சிகாகோவில் வேலை தேடுகிறார். சிகாகோ மேயர் தேர்தலில், Democratic coalition ஒன்றை உருவாக்கும் வேலையில் Blacks, Latinos, progressive among the whites அனைவரையும் ஒன்று சேர்த்ததில் ஒபாமாவிற்கு ஒரு பங்கு உண்டு. ஆனால், இதில் ஒபாமாவிற்கு நிறைவு வரவில்லை! Community Organizer ஆக இருந்து கொண்டு சில விஷயங்கள் தான் செய்ய முடியும். பெரிதாக சாதிக்க வேண்டுமென்ற தாகம், அவரை Harvard-க்கு சட்டம் படிக்க இழுத்துச் செல்கிறது.

ஒபாமா செதுக்கிய பாதை (பாகம் 1)

2008-11-05T18:41:00.000-08:00

[இது Democratic party-இல் ஒபாமாவின் வளர்ச்சியை சற்றே நின்று, திரும்பிப் பார்க்கும் ஒரு தொடர். இந்த வெற்றிக்குப் பின் பல வருட உழைப்பும், நேர்மையும் இருக்கிறது. அதைச் சித்தரிக்கும் Independent Documentary இது.]

வசீகர பேச்சு

2004-ஆம் ஆண்டு. ஜான் கெர்ரி தேர்தலில் போட்டியிடுகையில், மிக முக்கியமான டெமாக்ரடிக் கன்வென்ஷனில் பேச ஒரு திறமையான நபரைத் தேடுகிறார். அந்தத் தேடலின் போது, இளம் அரசியல்வாதியாகிய ஓபாமாவுக்கு அக்கூட்டத்தில் பேச அழைப்பு வருகிறது. ஒபாமா தன்னுடைய வாழ்க்கையின் கதையை, அமெரிக்காவில் நம்பிக்கையின் பாதையாக சித்தரிக்கிறார். ”ஒரு அரேபிய அமெரிக்க முஸ்லிமைப் பிடித்து, வக்கீல் கொடுக்காமல் முறையில்லாமல் அடைத்து வைத்தால், அது என் தனி மனித உரிமையைப் பறிக்கிறது” என்று சத்தமாகச் சொல்கிறார். Democratic Convention-இல் அமெரிக்க மக்களின் ஆதரவு அன்றே கிடைக்கிறது.

ஒபாமாவின் பேச்சில் ஒரு வசீகரம் இருந்தது. 4 வருடமாக வலது சாரியால் விதைக்கப் பட்ட தீவிரவாத பயம் புகுத்திய அரசியலால் இரண்டாகப் பிளந்து கிடந்த அமெரிக்கர்களை ஒன்று சேர்க்கும் சக்தி அன்று உருவாகத் தொடங்கியது. அந்தக் கூட்டத்தில் Democrat ஆதரவாளர்கள் பலரும் கண்கலங்கி நின்றனர். அமெரிக்கர்களின் பார்வையில் ஒபாமா பிரகாசிக்கத் தொடங்கினார்.

ஜே.கிருஷ்ணமூர்த்தி Vs டேவிட் போம்

2008-11-02T18:53:00.000-08:00

J Krishnamurti Vs David Bohm

(இவர்கள் சந்திப்பின் தொடர் இது. David Bohm ஆன்மீகத்தின் எதிர் துருவமாக இல்லாத போதும், அறிவியல் அடிப்படையில் கேள்விகள் கேட்டதால் இதில் சுவை இருக்கும்)

DB: மனிதர்கள் அனைவரும் ஏன் பகுத்தறிவிற்குப் புறம்பான விதத்தில் நடந்து கொள்கிறார்கள்?

JK: மனித இனம் அந்தக் கட்டுப்பாட்டிலேயே வளர்ந்து விட்டது. நம் கல்வி, நம் மதம், இவை அனைத்துமே இதை வளர்த்தது.

DB: இது நம்மை பதிலை நோக்கி இட்டுச் செல்லாதே. மறுபடியும், ஏன் கட்டுப்பாடு என்ற பல கேள்விகள் வரும்.

JK: அந்த கேள்விகள் அனைத்தையும் பார்க்கலாம்.

DB: இல்லை. அந்த திசையில் சென்றால் பதில் கிடைக்காது என்று சொல்கிறேன்.

JK: ஆம், சரி. ஏன் இப்படி வளர்ந்து விட்டோம்?

DB: உதாரணத்திற்கு... அன்று, மனிதன் ஒருவேளை தவறான திசையில் பாதை திரும்பி விட்டான் என்று பேசினோம்.

[...]

JK: ஆமாம். ”சிந்தனை” என்பது என்று முக்கியமானதோ, அன்றிலிருந்து பாதை மாறிவிட்டான் என்று நினைக்கிறேன்.

DB: எது “சிந்தனை” என்பதற்கு முக்கியத்துவம் கொடுத்தது?

[...]

JK: இது சுலபம். ஏனென்றால், மனிதனுக்கு அது மட்டும் தான் தெரியும்.

DB: இதிலிருந்து, அவன் சிந்தனைக்கு அதீத முக்கியத்துவம் கொடுப்பான் என்று சொல்ல முடியாது.

JK: ஏனென்றால், எனக்குத் தெரிந்தது தெரியாததை விட முக்கியம்.

DB: ஆனால், புத்திசாலித்தனம் இருந்தால் இந்த முடிவுக்கு மனிதன் வரமாட்டான். இது பகுத்தறிவல்ல.

JK: அதே. அதனால் தான் மனிதன் பகுத்தறிவிற்குப் புறம்பாக நடக்கிறான்.

DB: ஆனால்.... ஏன் இதைச் செய்தான் என்பது தான் கேள்வியே!

JK: தெரிந்ததை பிடித்துத் தொங்குகிறான். தெரியாததை எதிர்க்கிறான் என்று சொல்லலாமா?

DB: அது தெரிந்ததே. ஏன் என்பது தான் புரியவில்லை.

JK: ஏனென்றால், அவனுக்கு அது மட்டும் தான் தெரியும்.

DB: இதைப் புரிந்து கொள்ளும் அளவு ஏன் புத்திசாலித்தனம் இல்லை என்பது தான் என் கேள்வி.

JK: ஏனென்றால், அவன் பகுத்தறிவிற்குப் புறம்பானவன்.

DB: ஹ்ம்ம்.... அதையே சுத்தி சுத்தி வர்றோம்.

JK: இல்லையே!

DB: பாருங்க... கொடுத்த காரணங்கள் எல்லாமே பகுத்தறிவிற்குப் புறம்பானவன் என்பதற்கு உதாரணங்களே! காரணம் அல்ல.

JK: நான் அதைத் தான் சொல்கிறேன். நாம் அடிப்படையில் பகுத்தறிவிற்குப் புறம்பானவர்கள். சிந்தனைக்கு முக்கியத்துவம் கொடுத்தது தான் இதன் காரணம்.

[...]

DB: இப்படி முயற்சி செய்து பார்க்கலாம். அறிவியலிலுமே, பகுத்தறிவில்லாமல் அதில் முன்னேற முடியாது.

JK: ஓரளவிற்கு பகுத்தறிவில்லாமல்...

DB: சரி, ஓரளவிற்கு பகுத்தறிவில்லாமல். மனிதனின் பகுத்தறிவற்ற பகுதிகள், அறிவியலைத் தடுக்கிறது. அறிவியலார்கள், தங்களின் கோட்பாடுகளைப் பிடித்துத் தொங்கி, பொறாமை கொண்டு சில விஷயங்கள் நடக்கின்றன.

JK: அதே. அதே. பகுத்தறிவை விட்டு விலகிப் போகிறான்.

DB: இப்படி விலக மூலக் காரணம் என்ன என்று பார்க்கலாம்.

JK: ஆமாம். பார்க்கலாம்.

DB: ஆனால், அப்படி நிஜமாகப் பார்க்க முடியும் என்று முதலில் தெளிவு படுத்தனும்.

JK: ஓ.. காண்பிக்கிறேன். முதலில், தான் முற்றிலும் பகுத்தறிவற்றவன் என்பதை அங்கீகரித்து, பார்த்து, உணர்ந்து ஏற்றுக் கொள்ள வேண்டும்.

DB: ”முற்றிலும்” என்ற வார்த்தை இங்கே தொல்லை தரும். முற்றிலும் பகுத்தறிவற்றவன் என்றால் எதையும் பேசக் கூட முடியாதே?

JK: இல்லை, அது தான் என் கேள்வி. முற்றிலும் பகுத்தறிவற்றவன் என்றே நான் சொல்கிறேன். முதலில் அடையாளம் கண்டு கொள். பார். பகுத்தறிவுள்ள பகுதி, உன்னுள் இருக்கும் பிற பகுதியை விரட்டியடிக்கிறது என்று ஒத்துக் கொள்ளும் போது...

DB: அதல்ல. நீங்கள் சொல்வதை புரிந்து கொள்வதற்காகவாவது கொஞ்சம் பகுத்தறிவு இருந்தாகனும்.

JK: ஆமாம். சத்தியமாக.

DB: பகுத்தறிவு இருந்தாலும், பகுத்தறிவற்ற தன் செயல்களால் ஆட்கொள்ளப் படுகிறான் என்றே சொல்ல முடியும்.

JK: அதையே நான் கேள்விக்குள்ளாக்குகிறேன்.

DB: அப்படி இல்லையென்றால், பேச்சைக் கூட துவங்க முடியாது.

JK: கவனிக்கவும். பேசத் துவங்குகிறோம். சிலர் அடுத்தவர்களைக் கவனிக்க தயாராக உள்ளனர்.

DB: ஆம். அது பகுத்தறிவின் ஒரு அங்கம்.

JK: ஆனால், பெரும்பான்மையானவர்கள் கவனிக்கத் தயாராக இல்லை[*]. நான் அக்கறையுள்ளவர்கள், அதனால் கவனிக்கத் தயாராக இருக்கிறோம்.

[Ed: * - ஆனால், அறிவியல் உலகம் கவனித்துக் கொண்டு தானிருக்கிறது என்பதை ஜே.கே இங்கே புறக்கணிக்கிறார்.]

DB: ஆம். காது கொடுத்து கேட்பது என்பது பகுத்தறிவிற்கு அவசியம்.

JK: அதே. இருவரும் ஒன்றே தான் பேசுகிறோமா?

DB: ஆம்.

------------------------------------------------------

Source: The Ending of Time by J Krishnamurti and Dr. David Bohm.

------------------------------------------------------

மொத்தத்தில், இந்த உரையாடலில் இருந்து என்ன புரிந்தது என்று படித்தவர்களோ, ஆன்மீகவாதிகளோ எழுந்து சத்தமாக, தெளிவாகச் சொன்னால் நலம்! :-)

எமிலி, என் காதலி (Part - II)

2008-10-12T00:44:00.000-07:00

(தொடர்ச்சி)

லாம்பெர்ட்டால் எமிலி கர்ப்பமாகிறார்!

18-ஆம் நூற்றாண்டில், அந்த வயதில் குழந்தை பெறுவதற்கும், உயிரை ஊஞ்சலில் வைத்து உதைப்பதற்கும் அதிக வித்தியாசமில்லை!

சரி, இவர் தன் வாழ்க்கையில் கூடல், ஊடல், காதல் தவிர வேறு என்ன தான் செய்தார்?

தன் வாழ்வின் மிக அதிக நாட்களை அறிவியல் விவாதங்களிலும், ஆராய்ச்சிகளிலும் செலவிட்ட இவர், முக்கிய கையெழுத்துப் பிரதி (manuscript) ஒன்றை பிரசவத்திற்கு முன் முடித்திட நினைத்தார். பிரசவ மரணம் உறுதி என்பதும் தெளிவு. வயதான நிறைமாத கர்ப்பிணிப் பெண், ஆகஸ்ட் 30ஆம் நாள் தனது manuscript-ஐ முடித்து, நூலக மேலாளருக்கு கடிதத்துடன் தபாலில் அனுப்புகிறார். “இதைப் பதிவு செய்யுங்கள், தொலைத்து விடாதீர்கள். திரு. வால்டேர் என்னருகில் உள்ளார். உங்களை அதிகம் விசாரித்தார்” என்று ஆகஸ்ட் 31-இல் கடிதம் முடிகிறது. செப்டம்பர் 3-ஆம் நாளில், ஒரு பெண் குழந்தையை எமிலி பெற்று எடுக்கிறார். ஒரு வாரத்தில் பிரசவக் கோளாறில் உயிர் துறக்கிறார் எமிலி. விரைவில் பெண் சிசுவும் உயிர் துறக்கிறது.

இவர் அனுப்பிய அந்த manuscript-இல் அறிவியலின் அடிப்படை விதிகளுள் ஒன்றான Energy Conservation பற்றி எழுதியுள்ளார். அக்காலத்திலேயே, இயங்கு விசை (momentum) விடவும் இயங்கு சக்தி (kinetic energy) தான் அடிப்படையும், முக்கியமும் ஆகும் என்று வாதிட்டார். இதுவே, பின்னர் சில நூற்றாண்டுகள் தாண்டி, ஐன்ஸ்டீனின் உலகப் புகழ் பெற்ற “E = mc^2” என்று அவதாரமெடுக்கும். அறிவியலை புரட்டிப் போடும்! எமிலியின் கையெழுத்து ஓரமாக, சின்னதாக உள்ளே ஒளிந்திருக்கும்.

மேலும், எமிலியின் மறைவுக்குப் பின், வால்டேர், எமிலியின் மற்றுமொறு அறிவியல் புத்தகத்தை வெளியிட்டார். அது ஐசாக் நியூட்டனின் ”Principia Mathematica" என்னும் கணிதத்தின் அடிப்படை விதிமுறைகள் பற்றிய புத்தகத்தின் பிரஞ்சு மொழியாக்கம். எமிலியின் இப்படைப்பையே, இன்றும் பிரஞ்சு கல்லூரிகளில் மாணாக்கர்களின் கைகளில் காணலாம். நியூட்டனின் அறிவியல் கோட்பாடுகளை ஐரோப்பாவில் பிரபலப்படுத்திய பெரும் பங்கு எமிலிக்கும், வால்டேருக்கும் சேரும்.
(இப்படத்தில், நியூட்டனிடமிருந்து ஒளிக்கற்றைகளை வால்டேருக்கு கண்ணாடி மூலம் காட்டுவது நம் எமிலி)

மறைவுக்குப் பின், எமிலியைக் குறித்து வால்டேர் சொன்னது : “இவர் ஒரு பெரிய மனிதர். இவரது ஒரே தவறு, பெண்ணாகப் பிறந்தது!”

எமிலியின் மரணத்திற்குப் பின், அவர்களின் அறையில் வால்டேர் தனிமையில் எமிலியின் பெயரைப் புலம்பியபடியே இரவைக் கழித்ததாக அவரது உதவியாளர்கள் குறிப்பிடுகிறார்கள். வலியால் துவண்ட வால்டேர், தன்னில் பாதியை இழந்ததாக உணர்ந்து பாடுகிறார்:

அமைதியில் காத்திருக்கிறேன்!

நட்சத்திரத்தை பார்த்தபடி...

என் எமிலியை பார்த்தபடி...

முற்றும்.

எமிலி, என் காதலி (Part - I)

2008-10-11T03:03:00.000-07:00

எமிலி (Emilie du Châtelet) என்பவரை பலருக்குத் தெரியாது. ப்ரஞ்சு நாட்டின் வரலாற்றில் இவர் பெயர் பதிக்கப்பட்டிருந்தாலும், ப்ரஞ்சு நாட்டு மக்களும், இன்று இவரை மறந்தே போனார்கள். சரி, அப்படி என்ன தான் செய்தார் இவர்? ஒரு வரலாற்றுச் சிறப்பு மிக்க காதல் கதையின் நாயகி இவர்.

உயர் குடியில் பிறந்து வளர்ந்த எமிலி,

1733 இல், தன் 28 வயதில், கணவன் அசலூரிலும் மனைவி உள்ளூரிலுமான தாம்பத்ய வாழ்வின் நடுவில், ஒரு மிகப் பிரபலமான நபரைச் சந்திக்கிறார்.

அந்தச் சந்திப்பின் முடிவில், எமிலியிடம் இதயத்தை பறிகொடுத்த அந்த நபர், விரைவில் ஒரு மடல் அனுப்புகிறார்.

உன்னழகைப் பார்த்து, மனித இனத்தில் பாதி உன் எதிரியாகிவிடுமே!

உன் புத்திக் கூர்மையைப் பார்த்து, பயப்படுவார்களே!

இப்படி காதல் மயக்கத்தில் விழுந்தவர் வேறு யாருமல்ல. வால்டேர் (Voltaire) என்னும் கவி. தத்துவ ஞானி! பேரழகும் புத்திக் கூர்மையும் கொண்டவள் என்று வசிஷ்டர் வாயால் பிரம்ம ரிஷி பட்டம் கிடைப்பது எளிதல்ல. இப்படி எழுதியது பின்னாளில் நிரூபனம் ஆகும். அறிவியல் கருத்தரங்கு ஒன்றில், இவர் பெண் என்பதால் அனுமதி மறுக்கப்பட்டு, அதனால் ஆண் வேடம் பூண்டு கருத்தரங்கிற்கு, தனியாக சென்று வருவார் எமிலி!

நகருக்கு வெளியே ஒரு விடுதியில், மெழுகுவர்த்திகளுக்கு நடுவில், விருந்துண்டு மகிழ நால்வர் சென்றனர். அதில் புதிதாக அறிமுகமான இந்த ஜோடிகளுக்கு இடையே நெருப்புப் பற்றியது. எமிலியின் பிரகாசமான கண்கள், சில்மிஷங்கள், வால்டேரையும் விட வேகமான, கூர்மையான் எதிர் வாதங்கள் இவற்றைக் கண்ட வால்டேர் குதூகலிக்கிறார்! எமிலியைப் போல் ஆண் நண்பர்கள் கூட அவருக்கு அப்பொழுது இல்லை. வால்டேருக்கு வயது 40-ஐத் தொட்டு விட்டது. எமிலியோ 28 வயது மங்கை! இவ்வளவு புத்திக்கூர்மை! துடிக்கிறது நெஞ்சம். கொட்டுகிறது மேலும் கவிதை...

என்னை அடைவதற்கு ஏன் இவ்வளவு கால தாமதம்?

என் கடந்த கால வாழ்க்கை என்னவாயிற்று?

காதல் வேட்டையாடி, கானல் நீரை மட்டுமல்லவா கண்டிருந்தேன்!

நம் சுகத்தின் நிழலை மட்டுமே கண்டிருந்தேன்!

பெருமகிழ்வென்பதும் நீ! இளமை என்பதும் நீ!

உன்னருகில் அடையும் ஊடல் உவகையை என்னென்பேன்!

காதல் போதை தலைக்கேறிய போதும், வயது வால்டேரை வாட்டியது. எமிலி வால்டேருடைய உறவு முழுமையடையவில்லை. ஆனால், வாழ்வின் ஒவ்வொரு நொடிப் பொழுதையும் ரசித்து மகிழும் சுதந்திரப் பறவை எமிலிக்கோ, இது ஒரு பொருட்டா என்ன?! வால்டேரைப் பிரிந்து, எமிலி தாண்டிச் செல்கிறார். மாபெர்டுயிஸ் (Maupertuis) என்பவருடன் பழக்கம் உருவாகி தொடர்கிறது. ஆனாலும், வால்டேரின் அறிவுத்துணைக்கு அவ்வப்பொழுது ஓர் ஏக்கம். இதற்கிடையில், வால்டேருக்குத் தன் வயதைப் பற்றிய கவலைக் குறைந்து, காதலியைத் திரும்பப் பெற வேண்டும் என்று வேகம் வருகிறது. மடல்கள் பறக்கின்றன, மறுபடியும்.

எமிலி என் செய்வாள்? இருவருடனும் ஸ்நேகம் கொள்கிறாள்! அறிவுக்கு நீ! ஆசைக்கு நீ!!

வால்டேரும், தன் முதுமையில், காதலனாக இருக்க முடியாது என்று ஏற்றுக் கொள்கிறார். எமிலியின் நட்புக்கான ஏக்கமோ எள்ளளவும் குறையவில்லை.

காலம் கடக்கிறது. 3 குழந்தைகளின் பொறுப்பான தாயாகத் தன் கடமைகளைச் செய்கிறார் எமிலி. அறிவியல் வாழ்க்கையும் ஒரு பக்கம் ஓடுகிறது. கணவன் இன்னும் படையில் இருப்பதால், மேலும் பலருடன் காதல் வளர்கிறது. 15 வருடங்கள் கழிந்து, எமிலி தன் 42 வயதில், ஆஜானுபாகுவான கவிஞன் லாம்பெர்ட் (Lambert)-இடம் மனதைப் பறிகொடுக்கிறாள். அவனுக்கு வயது 27. எமிலியும் லாம்பெர்ட்டும் சந்தித்துக்கொள்ளும் சபையில், முற்றத்தில் உள்ள ஓர் யாழினை விருந்தினர்கள் நின்று ரசிப்பது வழக்கம். அந்த யாழின் அழகிய வேலைப்பாடுகளையும், நரம்பையும் ரசிப்பது போல் இவ்விருவரும் தங்கள் காதல் கடிதங்களை அதனுள் ஒழித்து பரிமாறிக்கொண்டனர்.

இதற்கிடையில், சில காலம் முன்புதான், “சந்தோஷம்” என்று ஒரு கட்டுரையும் எழுதி, அதில் வால்டேரின் உறவு பற்றி அலசுகிறார் எமிலி. ஒரு புத்திசாலிப் பெண் மகிழ்ச்சியடைய, ஆண் மகன் தேவை என்ற சிந்தனையின் வேடிக்கையை குறிப்பிடுகிறார் எமிலி. என்னதான் சிற்றின்பங்களை உறவுகள் அளித்தாலும், வயதாகும் காலத்தில் இதனைத் தீவிரமாக அனுபவிக்க முடியாது என்று எழுதுகிறார். பின் 42 வயதில், லாம்பெர்டிடம் எப்படி மயங்கினார்? யாழிடம் சென்று, ஒரு காதல் மடலைப் பார்க்கலாம்! இன்றும் பத்திரமாக இருக்கும் சுவையான ஒரு எமிலியின் மடல்:

காலை எழுகிறேன், முழுதும் உன் சிந்தனை.

விரைவில் வா. வரமாட்டாயா?

இன்று முழுவதும், என்னுடன் இளைப்பாறு.

வா! நாரைக்கு உணவளிக்கலாம்.

குதிரையேறி உலகை ரசிக்கலாம்.

அன்னார் லாம்பெர்ட்டின் காதலும் தலை கால் புரியாத நிலையில் பல காலம் ஓடியது. பின்னர் இவர்களும் பிரிந்து விடுகிறார்கள். எமிலியின் சிறகுகள் கூட்டுக்குள் அடங்குமா!

But, All good things have to come to end!

நிறைகளுக்கும் முடிவு உண்டு.

(தொடரும்)

அமார்தியா சென் VS லீ-க்வான்-யூ

2008-10-05T01:59:00.000-07:00

அமார்த்தியா சென்னும், லீ-க்வான்-யூ வும் பேசியது.

90-களில், திடீரென்று ”ஆசிய விழுமியங்கள்”(Asian Values) என்று ஒரு வாதம் பூதமாகக் கிளம்பியது. இது, வழக்கமான கிழக்கு/மேற்கு நாடுகளின் கலாச்சார விவாதங்களை ஒரு புதிய பரிமாணத்திற்கு எடுத்துச் சென்றது. அதன் சாரம், கிழக்கு நாடுகள் (ஆசியர்கள், குறிப்பாக) தங்களுக்கென்று தனியாக ஒரு வழிமுறைகளை, அதாவது மேலை நாடுகளின் வழிமுறைகளில் இருந்து விலகி, வேறுபட்ட வழிமுறைகளைக் கையாள்கிறார்கள். அதனால், ’மனித உரிமை மீறல்’ போன்ற அளவுகோள்கள் எப்படி கீழ்நாடுகளுக்குப் பொருந்தும் என்பது போன்ற விவாதம். இது தான் அவ்விவாதத்தின் அடிப்படை.

சரி, யார் விவாதித்தார்கள்?

சிங்கப்பூர் தலைவர் ”லீ-க்வான்-யூ” மற்றும் சீனா தலைவர் ”லீ பெங்” முன்னிறுத்திய வாதம் இது என்று சொல்லலாம். சமூகவியலார்களின் ஆய்வுகளுக்கும், இந்த அரசியல்வாதிகளின் வாதங்களுக்கும் இருக்கும் வேறுபாடுகளை இப்போது அலச அவசியமில்லை. ஆனால், இப்படி பூதம் கிளம்பிய போது, ஆசியாவின் முக்கிய நாடான இந்தியாவில், அதன் தலைவர்கள் என்ன செய்து கொண்டிருந்தார்கள்? ”ஆசிய விழுமியங்கள்” என்று சீனாவும், சிங்கப்பூரும் எதையெதையோ பேசிக்கொண்டிருந்த போது, இந்தியாவில் தலைவர்கள் மும்முரமாக வேறு விஷயத்தில் மூழ்கியிருந்தார்கள். Toyota வண்டிக்கு மாலை போட்டு, (Toyota)ரதயாத்ரா என்று கும்பல் சேர்த்து மசூதியை இடிப்பதில் மும்முரம். இந்தியாவின் பெருமை என்னவென்றால், 1 பில்லியன் மக்கள் கூட்டத்தில், யாராவது ஒருத்தர் பேசி விடுவார்! அப்படிப் பேசியவர் தான் ”அமார்த்தியா சென்.” சீனாவின்/சிங்கப்பூரின் வாதங்களில் உள்ள குறைகளை எடுத்துப் போட்டு உடைத்தார் அமார்த்தியா சென்.

(இது நேருக்கு நேர் நடந்த விவாதம் அல்ல. வசதிக்காக, இங்கு அந்த நடை தேர்வு செய்துள்ளேன்)

”ஆசிய விழுமியங்கள்”(Asian Values):

சிங்கப்பூர் வெளியுறவுத் துறை அமைச்சர்: தனி மனித உரிமைக்கு, கலாச்சாரத்தைத் தாண்டி யூனிவர்ஸல் அங்கீகாரம் கொடுப்பது அபாயத்தில் முடியும். அனைவருக்கும் ஒரே விதி என்பது பன்முகத்தன்மைக்கு எதிரி! (தனிமனித உரிமை எங்கள் கலாச்சாரத்தில் முக்கியமல்ல. எங்கள் கலாச்சார முறைக்கு எதிராக ‘தனி மனித உரிமை’ என்னும் கோட்பாட்டை மேலைநாடுகள் எங்கள் மேல் திணிக்கக்கூடாது. கலாச்சார பன்முகத்தன்மையை ஆதரியுங்கள்.)

சீனா அமைச்சர்: தனிமனிதன், தன் உரிமையை விட, தன் தேசத்தையே முன்னிறுத்த வேண்டும். இது சீனாவுக்கும் பிறருக்கும் பொருந்தும்.

லீ-க்வான்: ஆதிக்க அரசாங்க முறையினால் (authoritarian govt) வேகமாக பொருளாதார முன்னேற்றம் அடைய முடிகிறது.

அமார்த்தியா சென் : தென்கொரியாவும், சிங்கப்பூரும், தற்கால சீனாவும் இது மாதிரி விவாதத்திற்கு உதாரணமாக இருக்கலாம். இப்படித் தேவையான உதாரணங்களை மட்டும் தேர்வு செய்வதானால், வேகமாக வளர்ந்து வரும் African Botswana வில் ஜனநாயகம் தானே இருக்கிறது. அது எப்படி ஆதிக்கமுறையை விட அருமையாக செயல் படுகிறது என்று பார்க்க வேண்டும். அந்தந்த நாட்டின் குறிப்பிட்ட சுழலையும் ஆய்வு செய்வது அவசியம்.

லீ-க்வான்: குடி முறை உரிமைகள் (civil rights) ஆசியாவில் தோன்றவில்லை, அதனால் இங்கு அதன் மதிப்பு குறைவு தான்.

அமார்த்தியா சென் : குடி உரிமைக்கும், சமுகத்திற்கு நிகழக்கூடிய பேரபாயங்களுக்கும் உள்ள தொடர்பை முதலில் கவனத்தில் கொள்ள வேண்டும். பொதுவாக அரசாங்கத்தின் நடவடிக்கைகள், எப்போதுமே மக்களின் நிர்பந்தத்தில் தான் வேகமாக நடக்கின்றன. ஜனநாயக முறையில் வோட்டுரிமை, விமர்சனம், எதிர்ப்பு ஆகிய அரசியல் உரிமைகள் இதற்கு ஏதுவாக இருக்கின்றன. உதாரணத்திற்கு, பல நாடுகளில் பஞ்சத்தின் வரலாற்றைப் படித்தோமேயானால் (இது சென்னின் துறை) ஃப்ரீ ப்ரெஸ் இருக்கும் ஜனநாயக நாட்டில் கொடூரமான பஞ்சம் இது வரை வந்ததில்லை என்பது விளங்கும். ஏன், சீனாவின் Great Leap Forward இன் போது, பட்டினியால் வாடும் செய்திகளை மாவோவிடம் சொல்லத் தயங்கியதாகவும், அவருக்கு கெட்ட செய்தி கேட்பதில் எரிச்சல் வந்ததாகவும் செய்திகள் உண்டு தானே. இதனால், இறந்தவர்கள் 30 மில்லியன் மக்கள். ஜனநாயகத்தில் இது தவிர்க்கப்பட்டிருக்கும்.

எல்லாம் நல்லபடியாக இருக்கும் போது, ஜனநாயகத்தின் அருமை தெரியாது. துரதிர்ஷ்ட நேரங்களில் தான் ஜனநாயகத்தின் பலம் தெரியும்.

லீ-க்வான்: மேற்கு நாடுகளில் தான் தனிமனித சுதந்திரம் முக்கியமாக கருதப்படுகிறது. கிழக்காசியாவில் அப்படி இல்லை. ஒழுக்கம் (order, discipline) என்பது சமத்துவம், சுதந்திரம், சகிப்புத்தன்மை ஆகியவைகளை விட முக்கியமாக கருதப்படுகிறது. கிழக்காசியா என்று சொல்லும்போது, சீனா, ஜப்பான், கொரியா, வியட்னாம் ஆகிய நாடுகளை குறித்தாலும், நான் சொல்லும் ஆசிய விழுமியங்கள், இந்தியாவுக்கும் பொருந்தும்.

அமார்த்தியா சென் : புத்த மத கோட்பாடுகளின் படி, தனி மனித சுதந்திரத்திற்கு அதிக முக்கியத்துவம் கொடுக்கப்பட்டுள்ளது. (ஆதிக்க) Authoritarian Confucianism மட்டுமே ஆசியாவின் கோட்பாடுகள் ஆகிவிடாது. சகிப்பு தன்மையின் முக்கியத்துவம் சூத்ரகாவின் நாடகங்களிலும், கபிரின் பாடல்களிலும், அக்பரின் அரசியல் அமைப்புக்களிலும் காணலாம். அடிப்படை நிலையில் இருந்தே சமத்துவம் என்பதை அசோகரின் ஆட்சியில் காணலாம். ஐரோப்பாவில், Inquisition நடந்து கொண்டிருந்த நேரத்தில், இந்தியாவில் அக்பரின் மத-சகிப்புத்தன்மை சிறந்தோங்கியதைக் குறிப்பிட வேண்டும்.

வேட்டையாடு விளையாடு - 2

2008-10-04T15:39:00.000-07:00

ஸியட்டில் (நீர்)மிருககாட்சிசாலையில் (Seattle aquarium) வாரா வாரம் சுறா காணாமப் போகுதாம். குழம்பிப்போன zoo-keepers, ராத்திரி முழிச்சிருந்து பார்த்தப்புறம் தான் விஷயமே புரியுது.

ஆக்டபஸ் (Octopus) முதுகெலும்பில்லாத ஜந்து. ஆனாலும் அதுக்கு குட்டி சுறாவின் மேல் ஒரு கண்! 4-5 அடி நீளம் இருந்தாக்கா சாப்பிட முடியாதா என்ன?! ராட்சத ஆக்டபஸ், பசியில் வேட்டையாடும்போது இதுவும் கூட நடக்கலாம். இயற்கை விந்தையானது!

அய்யா இளையராசா.... இது முடிவா? தொடக்கமா?

2008-10-01T22:37:00.001-07:00

ரிடயர் ஆகும் காலத்தில், இளையராஜாவிடமிருந்து (கீழே சொடுக்கவும்) இப்படி ஒரு பாடல்! அய்யா இளையராசா.... இது முடிவா? தொடக்கமா? ரொம்ப ஸ்டைலா, ”ஹ்ம்ம்... இது ஒரு sonata. அவ்வளவு தானே” ந்னு சொல்லிட்டு போக முடியலயே!

ஏதோ ஒரு பெரிய இழப்பை நினைவுபடுத்தி, மனதை வருடும், இந்த பாடலுக்கு பல விதமான காட்சியமைப்புக்கள் கற்பனை செய்யலாம். திரைப்படத்தை கொஞ்சமே மறந்து, புதுசா ஒரு முயற்சி செய்து பார்த்தேன்... இது எப்படியிருக்கு?

இது போல வேறெங்கும் சொர்க்கம் இல்லை.

இது Contact என்ற திரைப்படத்தின் தொடக்க காட்சி. பூமியில் கட்டெறும்புகளாக சுற்றித் திரியும் மனிதர்களாகிய நாம், அதையும் தாண்டி வெளியில் சென்று பார்த்து அறிந்தது இது. உலகம் அண்டத்தின் எவ்வளவு சிறிய அங்கம் என்பது, எத்தனை கதைகள் சொன்னாலும் நம் மண்டையில் ஏறாது. பார்க்கனும். பார்க்கவும்.

அக்கதையில் (திரைப்படத்தில் அல்ல, புத்தக வடிவில்) ஒரு அறிஞர், cancer என்னும் உயிர்க்கொள்ளியால் சாக நேரிடும்போது, ஒரு விண்வெளி வாகனத்தில் அமர்ந்து பூமியை விட்டு ”ஒரு வழிப் பயணம்” மேற்கொள்கிறார். விண்வெளியில், சாவகாசமாக அமர்ந்து, நேரெதிரே இருக்கும் ஒரே ஜன்னலில் முழு பூமியையும் பார்த்தபடியே பயணம் செய்து நித்திரைக்குப் போகும் வாய்ப்பை தேர்வு செய்கிறார். வசதி படைத்த புத்திசாலி. (மேலே பார்க்கும் காட்சிக்கும், இந்த குறிப்புக்கும் சம்பந்தமேயில்லை. இது நான் போடும் முடிச்சு! இசை படுத்தும் பாடு!! வேறென்ன!)

மனிதா... உன் மேல் கவனம் செலுத்த வேறேந்த சக்தியும் இல்லைன்னு இதுக்கும் மேல சொல்லனுமா? ஒன்ன நீதாம்பா காப்பாத்திக்கனும். இருக்குறது ஒரே வீடு. கையில் இருப்பதோ ஒரே வாழ்க்கை. அதில் என்ன சாதிக்கப் போகிறோம் என்பது நம் கையில்.

நான் பார்த்த பூமிக்கு நன்றி!

&amp;amp;amp;lt;p&amp;amp;amp;gt;&amp;amp;amp;lt;a href="undefined?e"&amp;amp;amp;gt;undefined&amp;amp;amp;lt;/a&amp;amp;amp;gt;&amp;amp;amp;lt;/p&amp;amp;amp;gt;

பொன் விதி (Golden Rule)

2008-09-30T00:27:00.000-07:00

”அடுத்தவனின் எந்தவொரு செய்கையை நீ குறை கூறுகிறாயோ, அதை நீ செய்யாதே”

இதை கிரேக்க நாட்டில் தேல்ஸ்(Thales) என்பவர் 600 கி.மு காலத்திலேயே சொல்லியிருக்கிறார். இதையே, பலவிதமாக மேலும் பல கலாச்சாரங்களில் பலர் சொல்லிச் சென்றிருக்கிறார்கள். இதற்கு பொதுவாக பொன்விதி (Golden Rule) அல்லது "எதிக்ஸ் ஆஃப் ரெஸிப்ராஸிடி" (Ethics of Reciprocity) என்று பெயர்.

சரி, இதன் முக்கியத்துவம் என்ன? கடவுள் என்ற சமாச்சாரம் இல்லாமலேயே, அடிப்படை ஒழுக்க மதிப்பீட்டினை, மனிதர்கள் சிறு பருவத்திலிருந்தே கற்றுக் கொள்ள நிறைய வழிமுறைகள் உள்ளன. இந்த பொன்மொழி, அத்தகைய வழிமுறைகளுல் ஒன்றாகும்.

ஆக, ஒரு தகப்பன் தன் 3 வயது குழந்தைக்கு இந்த அடிப்படையில் புத்திமதி சொல்லி வளர்க்கிறான். இப்படியான சூழ்நிலையில், ஒரு நாள் பிற்பகலில் இருவரும் தெருவில் நடந்து போகிறார்கள். அப்போது, ஒவ்வொரு வீட்டு வாசலைக் கடக்கும் போதும், குழந்தை நின்று, வீட்டினுள் விளையாடிக் கொண்டிருக்கும் மற்றவர்களை உற்று நோக்கியபடி நின்று விடுகிறது. அப்போது தந்தைக்கும் குழந்தைக்கும் நடந்த வாதம்.

தந்தை: கண்ணு... என்னடா நிக்கறே? வா போகலாம்.

குழந்தை: (நின்று வீட்டினுள் வெறித்து பார்க்கிறது) ம்ம்....

தந்தை: (கையை பிடித்து மெதுவாக இழுத்து) Park போகனுமா வேணாமா?

குழந்தை: அப்பா, அந்த அண்ணா உன்னையே மாதிரியே tennis bat வச்சிருக்கான் பாரு!

தந்தை: ம்ம்.. ஆமா. (வேறு சிந்தனையில், அமைதியாக மேலும் நடக்கிறார் தந்தை)

குழந்தை: (அடுத்த வீட்டின் வாசலிலும் நின்று வெறித்து உள்ளே பார்க்கிறது)

தந்தை: என்னடா கண்ணு.. வா போகலாம். இப்படி அடுத்தவங்கள வெறிச்சுப் பாக்கக்கூடாதுடா கண்ணு.

குழந்தை: ஒய்?

தந்தை: ஹ்ம்ம்... அவங்களுக்கு சங்கடமா இருக்கும்.

குழந்தை: ஒய்?

தந்தை: அதாவது, அவங்களுக்கு அடுத்தவங்க வெறிச்சு பாத்தா பிடிக்காது. அவங்களுக்கு பிடிக்காதத நாம பண்ணக் கூடாதுன்னு உனக்கு தான் தெரியுமே.

குழந்தை: ஏன் அவங்களுக்கு பிடிக்காது?

தந்தை: ம்ம்... அப்பாவும், நீயும் நம்ம வீட்டுக்குள்ள விளையாடும் போது, வாசலில் அண்ணா நின்னு வெறிச்சு பாத்தா நமக்கு இடஞ்சலா இருக்குமே? அது மாதிரி தான்.

குழந்தை: எனக்கு இடஞ்சலா இருக்காதேப்பா.. (சொன்னபடியே அடுத்த வீட்டு வாசலின் முன் போய் நின்று வேடிக்கை பார்க்கிறது)

(முற்றும்)

ஆல்ப்ரெட் & ஆல்பெர்ட்

2008-09-19T23:12:00.000-07:00

Albrecht & Albert Duhrer

இந்த கைகள், அல்ப்ரெட் டூரெர் (Albrecht Duhrer) என்பவரின் பிரபலமான ஒரு ஓவியத்தைப் பார்த்து, சிறு வயதில் நான் வரைந்தது. இந்த ஓவியத்தின் பின்னணியில், இணையத்தில் உலவும் ஒரு கற்பனைக் கதையை, இங்கு பதிவு செய்கிறேன்.

================================================

ஒரு குக்கிராமத்துல, 500 வருஷங்களுக்கு முன்னாடி, ஒரு பொற்கொல்லன் தன்னோட குடும்பத்துக்காக உயிரக் கொடுத்து உழைக்கறான். 18 புள்ளைகள பெத்தவனாச்சே! தினமும் 18 மணி நேரம் உழைச்சாதான் எல்லாருக்கும் சாப்பாடு போட முடியும். இந்த காலத்துல இருக்குற minimum wage, வாரத்துல அஞ்சு நாட்கள் மட்டும் வேலை, தினம் எட்டு மணிக்கு நேரத்துக்கு மேல வேல செஞ்சா overtime சம்பளம், இத்யாதி இத்யாதி... எல்லாம் கிடையாது அப்போ! [1]

அப்படிபட்ட கஷ்ட காலத்துலயும், 18 புள்ளைகள்ல, ரெண்டு துடிப்பான பசங்க இருந்திருக்காங்க. ஆல்பெர்ட் & ஆல்ப்ரெட். ரெண்டு பேருக்குமே பட்டணத்துக்குப் போய் கலைக் கல்லூரியில் படிக்கனுமுன்னு ஆசை. ஆனா அப்பாவோ சோத்துக்கு லாட்டரி அடிச்சுகினு இருக்காரு! ஆக, பசங்க என்ன பண்ணினாங்க? ஒரு ராத்திரி, ஒத்த ரூபா சுண்டிப் போட்டு, பூவா தலையா பாத்து, ஒரு முடிவுக்கு வந்தாங்க. அதாவது, பூவா தலையா பாத்ததுல ஜெயிச்ச ஆல்ப்ரெட் பட்டணத்துக்கு போறான். தோத்த ஆல்பெர்ட், அடுத்தவனுக்காக சுரங்கத்துல வேல பாத்து காசு சம்பாதிக்கறான். 4 வருஷம் படிப்பு முடிஞ்சதும், படிச்சவன் சாசு சம்பாதிச்சு அடுத்தவன் கலைக் கல்லூரிக்கு போக உதவனுமுன்னு முடிவு செய்யறாங்க.

4 வருஷம் தாண்டியாச்சு. ஆல்ப்ரெட் வீட்டுக்கு வர்றான். குடும்பத்துல பெரிய விருந்து. சந்தோஷமா ஆடிப் பாடி, கடசியில ஆல்ப்ரெட் பெருமிதத்தோட சொல்றான். ”தம்பி ஆல்பெர்ட்... இப்போ நீ பட்டணத்துக்குப் போய் படிக்கலாம். நான் ஒன்னுடைய செலவ பாத்துக்கறேன்” ஆனா, ஆல்பெர்ட் தலை குனிந்து அழுதபடி இருக்குறான். கடசியில, எழுந்து தன் கன்னத்துல வழியிற கண்ணீரத் தொடச்சிட்டே, குடும்பத்துல இருக்குற எல்லாரையும் பாத்து மன்னிப்பு கேட்கறான்.

“அண்ணா... என் கையத் தூக்கி உன்ன பாராட்டக் கூட என்னால முடியல. 4 வருஷம் சுரங்கத்துல வேல பாத்த என் கையப் பாரு! ஒவ்வொரு விரல்லயும் எலும்பு முறிஞ்சு போயி கிடக்கு. நானாவது, ப்ரஷ்ஷ புடிச்சு ஓவியம் வரையறதாவது! என் காலமும், வாய்ப்பும் போயிடுச்சு!”

தம்பியோட தியாகத்துக்கு என்ன கைமாறு செய்யப் போறோமுன்னு தெரியாம முழிக்கறான் ஆல்ப்ரெட். தம்பியின் நொடிந்து போன விரல்களோட நலிந்த கைகளையே ஒரு ஓவியமாக வரையறான். அந்த ஓவியத்துக்கு “கைகள்” அப்படீன்னு பெயர் கொடுக்கறான். ஓவியத்த பாத்து உணர்ச்சி ததும்பிய உலக மக்கள், “வழிபடும் கைகள்” ந்னு பெயர் கொடுத்து, இன்னைக்கும் இந்த ஓவியத்த கொண்டாடுறாங்க.

அடுத்த முறை கண்காட்சியிலோ, புத்தகத்திலோ, இணையத்திலோ இந்த ஓவியத்த பாத்தாக்கா, மறுபடியும் ஆழமா பார்க்கத் தோணும். தோணனும். என்னதான் ஒரு தனிமனுஷன் இந்த ஒலகத்துல சாதனை புரிஞ்சாலும், அதுக்குப் பின்னாடி பலருடைய தியாகங்கள் இருக்குதுன்னு இந்த ஓவியம் புரிய வைக்கும். தியாகிகளுக்கு, அதுவும் அமைதியான தியாகிகளுக்கு, நம்மளால ஒன்னும் பெரிய அளவுல பண்ண முடியலன்னாலும், குறைந்த பட்சம் மனசுக்குள்ள ஒரு நன்றி உணர்வாவது வளத்துக்கலாம்.

----------------------------------------

[1] - ஹ்ம்... பல நாடுகளில் நடுத்தர வர்க்கத்துக்கு மட்டும் தான் இந்த சலுகைகள். அடிமட்ட மக்கள் இன்னும் இதே மாதிரி, 500 வருஷத்துக்கு முந்தைய அவல வாழ்க்கைதான் இன்றும் வாழ்கிறார்கள். அடச்சே!

காட்டுமிராண்டி பயலுகளுக்கு என்ன பண்ண நீயி?

2008-09-13T19:59:00.001-07:00

(முன்குறிப்பு: என் அமெரிக்க நண்பருக்காக, நான் இந்த அற்புதமான காட்சிக்கு ஆங்கில subtitles சேர்த்து விட்டேன். அது இங்கே இதோ!)

தேவர்: ஏய்! சக்தி... நாந்தான்.

(இடி முழக்கம்)

(சக்தி தேவரிடம் செல்கிறான்)

தேவர்: இங்கிட்டு வா.

தேவர்: ஆஸ்பத்திரிக்கு போனிகளா?

சக்தி: ஆமாயா.

தேவர்: கோவில் கும்பிடறதுக்குத் தான் இருக்குன்னு சண்டை போட்டீகளே... இப்போ இந்த ஊரோட நெலம புரிஞ்சுதா?

சக்தி: நல்லாவே புரியுது.

சக்தி: நான் செஞ்ச தப்பும் புரியுது. அதுக்கு தண்டனையா... (தொண்டை கணைத்துப் பின்) இந்த ஊர விட்டே போயிடலாமுன்னு இருக்கேன்.

தேவர்: ஊர விட்டு..? ஊர விட்டு போறீகளா...?

தேவர்: ஹ! நடந்ததுக்குப் பரிகாரம் தேடாம, ஊர விட்டுப் போறேன்னு சொல்றது கோழத்தனமில்ல்?

சக்தி: (சத்தமாக) அதுக்காக...

தேவர்: அதுக்காக?

(இடி முழக்கம்)

சக்தி: (மெதுவாக) அதுக்காக... நடக்குற காட்டுமிராண்டித் தனத்த வீரமுன்னு நெனச்சுட்டிருக்குறது... ம்ம்... முட்டாள்தனம்.

(தூணுக்குப் பின் ஒளிந்து கொள்கிறான்)

தேவர்: இந்த காட்டுமிராண்டிப் பயக் கூட்டத்துல, உங்கொப்பனும் ஒருத்தந்தேங்கிறத மறந்துறாத.

சக்தி: அப்படிப் பாத்தா... நானுந்தாய்யா ஒருத்தன். ஆனா அத நெனச்சு பெருமப் பட முடியல.

சக்தி: (சத்தமாக) எரநூறு வருஷம் பின்தங்கி இருக்குற இந்த கிராமத்துல, நான் படிச்ச படிப்பெல்லாம் வேஸ்ட்டாக்க விரும்பலைய்யா!

தேவர்: எரநூறு வருஷம் பின்தங்கித்தான் போயிட்டோம், ஒத்துக்கறேன்.

(எழுந்து நடந்தபடி)

ரெண்டாயிரம் வருஷமா...

வேல்கம்பையும் அருவாளையும் தூக்கிக்கிட்டு, ”வெற்றிவேல்! வீரவேல்!”னு சுத்திக்கிட்டு இருந்த பயலுக...

நேதாஜி சுபாஷ் சந்திரபோஸ் சண்டைக்கு ஆள் வேணுமுன்னு கேட்டப்போ... ஓடிப்போய் மொதல் வரிசயில நின்ன பய, முக்கால்வாசி பய நம்ம பய தேன்!

திடீர்னு அவன வேல்கம்ப தூக்கிப் போட்டுட்டு, விஞ்ஞானம் பேச வாடான்னா எப்படி வருவான்?

நீ படிச்சவனாச்சே?

கூட்டிகிட்டு வா! அங்கே கூட்டிகிட்டு வா!

ஆனா, அந்தப் பய மெதுவாத் தான் வருவான். மெதுவாத்தான் வருவான்.

சக்தி: (பொறுமையிழந்து) மெதுவான்னா, எம்புட்டு மெதுவாய்யா? அதுக்குள்ள நான் செத்துருவேன் போலிருக்கே!?

தேவர்: போ! செத்துப் போ! நாந்தடுக்க முடியுமா?

எல்லா பய புள்ளயும் ஒரு நாளைக்கு சாக வேண்டியது தேன்.

வாழறது முக்கியந்தேன், இல்லேன்னு சொல்லல.

ஆனா மத்தவங்களுக்கு பயனுள்ள வாழ்க்கையா வாழ்ந்துட்டு செத்துப் போறதுதேன் அந்த சாவுக்கே பெருமை.

வெத வெதச்ச உடனே பழஞ்சாப்பிடனுமுன்னு நெனக்க முடியுமோ?

இன்னிக்கு நான் வெதைக்கிறேன்.

நாளைக்கி நீ பழஞ்சாப்பிடுவே.

அப்புறம், ஓம்மவேஞ் சாப்பிடுவான்.

அதுக்கப்புறம், அவேன் மவேஞ் சாப்பிடுவான்.

அதெல்லாம் இருந்து பாக்குறதுக்கு, நான் இருக்க மாட்டேன்!

ஆனா, வெத... நான் போட்டது!

இதனால என்ன பெருமையா? ஹே?!!

கடமே! ஒவ்வொருத்தருடைய கடமே!

சக்தி: ஆனா இந்த மண்ணுல தண்ணிக்குப் பதிலா ரத்தத்த ஊத்துற வரைக்கும், எத வெதச்சாலும் வெளங்காதுயா!

என்ன வுட்டுரங்கய்யா... நான் போறேன்.

(நகர்ந்து போகும் சக்தியை சட்டையைப் பிடித்து தேவர் நிறுத்துகிறார்)

தேவர்: (சிறிது யோசனையுடன்) தாடியும் மீசையும் வச்சுகிட்டு, நெஞ்ச நிமிந்து ஐயாவ பேசற வயசுல்ல!

சக்தி: இல்ல.... அப்படி இல்லைய்யா...

தேவர்: வேற எப்படி?

(சத்தமாக) வேற எப்படின்னு கேக்கறேன்?

தாயில்லாத புள்ளயாச்சேன்னு ஊட்டி ஊட்டி வளத்தேனுல்ல?

இது வரைக்கும் ஒரு வார்த்தை பேசியிருப்பேனா உங்கிட்ட? ஒரு வார்த்த?

(சக்தி பார்வையை திருப்புகிறான். தேவர் குனிந்து, சக்தியின் முகத்தைப் பார்த்து)

என்னா? ஹே!

நான் என் கடமைய செஞ்சுப்புட்டேன்.

நீ ஓங் கடமயச் செஞ்சீயா?

நீ பெரிசா லண்டன்ல படிக்கறதுக்காக... (நாற்காலியில் அமர்ந்தபடி)

இந்த பூமியில பொன்னா வெளச்சு அனுப்புச்சமே? அந்தக் காட்டுமிராண்டிப் பயலுகளுக்கு என்ன பண்ண நீயி?

எதாவது பண்ணு!

அதுக்கப்புறம் வீட்ட விட்டுப் போ!

ஹோட்டல் வையி! ரெஸ்டாரண்டு வையி!

அந்த தெலுங்கத்த [...] கலியாணம் பண்ணிக்க.

பணஞ்சம்பாரீ. என்ன இப்போ!?

போயேன்!

சக்தி: நல்லது... இங்கேருந்து தான் செய்யனுங்கறது இல்லயா.

வெளிய இருந்துஞ்... செய்யலாம்.

ம்ம்.. நான் போறேன்யா.

தேவர்: போயிட்டு வர்றேன்னு சொல்லுங்களேன்!

அந்த நம்பிக்க தான், வீட்டுல உள்ளவகளுக்கு முக்கியம்.

தே! (சலிப்புடன்) எங்கயா கணக்குப்புள்ள?

(சத்தமாக) எலே... யார்றா அவன்? எங்கே கணக்குப் புள்ள?

கணக்குப்புள்ள: ஐயா...

தேவர்: (மெதுவாக) இங்கே தான் இருக்கியா..

ஐயா.. வியாபாரமா வெளியூர் போறாகளாம்.

ரொம்ப நாள் இங்கே இருக்க மாட்டாகளாம்.

அவுகளுக்கு டிக்கெட் போடு.

கணக்குப்புள்ள: ஒரு பத்து நாள் தள்ளி எடுக்கட்டுங்களா?

தேவர்: என்ன அப்போ? ஒரு பத்து நாளு தங்க மாட்டீயளா?

(கணக்கு போகிறார். சக்தி தேவர் முன் வருகிறான்)

(தேவர் அமருமாறு சைகை செய்கிறார். சக்தி முட்டி போடுகிறான்)

தேவர்: பத்து நாள் இருக்க மாட்டீயளா?

எம் பயள பக்கதுலயே வச்சுப் பாக்கணுங்கற ஆசை எனக்கு இருக்காதா?

நீ ஊரெல்லாம் சுத்திட்டி வரும்போது, ஐயா (குரல் தழு தழுக்கிறது) போயிட்டா என்ன பண்ணுவீங்க?

சக்தி: ஐயா... நான்... ஒங்கள விட்டுட்டு போகலேங்கைய்யா...

அங்கப் போயி.. பிஸினஸெல்லாம் ... ஒகேயானதும் ஒங்களையும்... கூட்டிட்டுப் போறேங்கய்யா.

தேவர்: என்னையா? ஹ்ம்ம்.. ஹ்ம்ம்...

இந்த கட்டை இங்கேயே வெந்து எரிஞ்சு சாம்பலாகி இந்த மண்ணுக்கு ஒரமாகுமே தவிர ... வெளிய வராது. இந்த மரத்த வேறோட சாய்ச்சிராதப்போ... அம்புட்டுதான் நான் சொல்லுவேன்.

புரியுதா?

சக்தி: ஐயா... நான் இந்த ஊருக்கு நல்லது எதாவது செஞ்சு... செய்வேன்யா... என்ன நம்புங்க!

தேவர்: (அழுதபடி) ஒங்களத்தான நம்பனும்!

இந்த வீட்டுல வேற யாரு இருக்கா நம்பறதுக்கு ...

(தேம்பி அழுகிறார்)

போ...

சக்தி: போகட்டுமாய்யா...

தேவர்: (கண்களில் நீர் வழிந்த படி) ஹ்ம்ம்.. போ...

(சக்தி எழுந்து போக, தேவர் தலை குனிந்து அழுதபடி இருக்கிறார்)

(சக்தி, மழை நீரில் சருக்கியதும், பதறி எழுகிறார் தேவர்)

தேவர்: அப்பா!! மொல்ல...

சக்தி: ஹ்ம்ம்.. தண்ணி... வழுக்கி...

(புயல் காற்றின் சத்தம்)

(தலையை சொறிந்த படி சக்தி செல்கிறான். தேவர் அத்திசையில் பார்த்தபடி நிற்க... கடந்து சென்ற சக்தி, இரு தூண்களுக்கு நடுவே தேவரை எட்டி பார்க்கிறான்)

(தேவர் சற்றே நிதானித்து, வேறு பக்கம் பார்வையை திருப்பிக் கொள்கிறார்)

(புயல் காற்றின் சத்தம் அதிகரிக்கிறது)

”கம்பர், திருவள்ளுவர், இளங்கோ” பற்றி பாரதி.

2008-09-01T21:07:00.000-07:00

தமிழ்நாட்டு வீரர்களுக்கும், கவிகளுக்கும், லோகோபகாரிகளுக்கும் இது வரை எவ்விதமான திருவிழாவையும் காணவில்லை. பூர்வீக மகான்களின் ஞாபகத்தை தீவிரமாக பக்தியுடன் வளர்க்காத நாட்டில் புதிய மகான்கள் பிறக்க வழியில்லை. தப்பித் தவறி ஓரிருவர் தோன்றினாலும் அவர்களுக்குத் தக்க மதிப்பு இராது. பண்டைக் காலத்து சக்திமான்களை வியப்பதும், அவர்களுடைய தொழிற் பெருமையை உலகறிய முழக்குவதும், கூடியவரை பின்பற்ற முயல்வதுமாகிய பழக்கமே இல்லாத ஜனங்கள் புதிய சக்திமான்களை என்ன வகையிலே கணிப்பார்கள்.

எதனை விரும்புகிறோமோ அது தோன்றுகிறது.
எதை ஆதரிக்கிறோமோ அது வளர்ச்சி பெறுகிறது.
பேணாத பண்டம், அழிந்து போகும்.
பழக்கத்தில் இல்லாத திறமை, இழந்து விடப்படும்.

அறிவுடையோரையும் லோகோபகாரியையும், வீரரையும் கொண்டாடாத தேசத்தில் அறிவும், லோகோபகாரமும், வீரமும் மங்கிப் போகும். தமிழ்நாட்டில் இப்போது “புதிய உயிர் தோன்றியிருப்பதால், நாம் இவ்விஷயத்தில் தமோகுணஞ்செலுத்தாமல் கம்பன், இளங்கோ, திருவள்ளுவர் முதலிய மகாகவிகளுக்கு ஞாபகச் சிலைகளும் வருஷோத்ஸவங்களும் ஏற்பாடு செய்ய வேண்டும்.
[...]

பண்டித சபைகளையும், பொது ஜன ஆரவாரங்களையும் கோலாஹலமாக நடத்தி, எல்ல வர்ணத்தாரும் எல்லா மதஸ்தரும் சேர்ந்தால் சந்தோஷமும் அறிவுப்பயனும் உள்ள மாண்பும் பெற இடமுண்டாகும். மத பேதங்கள் பாராட்ட இடமில்லாத திருவிழாக்கள் தமிழ்நாட்டில் எவ்வளவு அவசியமென்பதை ஒவ்வொரு அறிவாளியும் எளிதாக ஊகித்துக் கொள்ளலாம்.

சின்னப்பெண் பெண்ணல்ல, வண்ணப் பூந்தோட்டம்

2008-08-26T12:54:00.000-07:00

தமிழ் சினிமா வரலாற்றில் (ரீமேக்கையும் சேர்த்து :-)) மிகச்சிறப்பான duet songs என்று ஒரு பட்டியல் போட்டால், அதில் சில பாடல்களை உச்சத்தில் வைக்கலாம். அதில் ஒன்று இது.
சின்னப்பெண் பெண்ணல்ல, வண்ணப் பூந்தோட்டம்

குரலுக்கும், இசைக்கும், costumes-க்கும், நடிப்புக்கும், இயக்கத்திற்கும், காமிராவுக்கும், வார்த்தைக்கும் நடந்த போட்டி.
4 நிமிடம் முடிந்ததும், ’செம்மேனி என் மேனி உன் தோளில் ஆடிய நாளில்’ உணர்ந்த நம் காதலியின்/காதலனின் ஸ்பரிஸத்தை, இன்று நம்மை உணர வைத்திருக்கும் கலைப் படைப்பு.

முதல் சரணத்தின் நாணம், இரண்டாம் சரணத்தில் தொலைந்து போய், யதார்த்தமான, சுற்றத்தைப் புறக்கணிக்கும் கவலையற்றப் பெண்ணாக ஆகி, இறுதியில் நிஜத்திற்கு வந்து, இருவரும் படியில் ஒன்றாகப் பிரயாணிக்கும்.... சுரேஷ்க்ரிஷ்னாவின் முதல் படமா இது!!

------------------------
பி.கு: இந்தப் பதிவு எழுதியபோது, மற்றொருவரின் பழைய பதிவு கண்ணில் பட்டது. அருமையான் அந்தப் பதிவு இதோ.

ஆர்.எஸ்.எஸ். இல்லை இல்லை... RSS!!

2008-08-24T18:00:00.000-07:00

[மு.கு: இது அரசியல் பதிவு கிடையாது!]

தொழில்நுட்பம், புது மென்பொருள் (software) என்றாலே என் அப்பா ஓடி விடுகிறார். அநேகம் பேர் இப்படித்தான்! கணிணி யுகத்தில், எது தெரிந்து கொள்ள வேண்டிய புது விஷயம், எது நாளை இல்லாமல் போய்விடக் கூடிய வெங்காயம் என்பதை புரிந்து கொள்வது கொஞ்சம் சிரமம் தான். இந்தச் சூழலில், RSS பத்தி சொல்லனும்.

RSS என்பது email போன்று வந்திருக்கும் ஒரு விஷயம். இது வந்து பல நாட்கள் ஆகிவிட்டது. பிரபலமும் ஆகி விட்டது.

பல இணைய தளங்களில் இது போன்ற படங்களைப் பார்த்திருப்பீர்கள். அது தான் RSS feeds அல்லது Atom feeds என்பது. இதைப் பார்த்தவர்கள், இது என்ன என்று கேட்டு, அடுத்தவர் விளக்கம் சொல்ல ஆரம்பிச்சதும் கொட்டாவி விட்டபடியே, ”ஆமா... தசாவதாரம் பாத்தீங்களா?” என்று topic மாத்துவதை பார்த்து இருப்பீர்கள். அல்லது, நீங்களே அதை செய்திருப்பீர்கள். அப்படியானால், உங்களுக்காகத் தான் இந்தப் பதிவு. இது ஒன்றும் பெரிய மம்போ-ஜம்போ விவகாரம் இல்லை. எனவே படிக்கவும்.

கணி்ணியும், இணைய தளங்களும் பிரபலம் ஆனதும் எல்லாரும் போட்டி போட்டுக்கிட்டு, தளங்களுக்குச் சென்று படிக்க ஆரம்பிச்சீங்களா? அப்புறம் என்ன ஆச்சு? 1, 2 என்றிருந்த தளங்கள், இப்போது 10-15, சிலருக்கு 30-40 தளங்கள் வரை பரிச்சயம் ஆயிடுச்சு. அதாவது, தினம் தினம் எத்தனை தளங்களுக்கு தான் போய் செய்திகளைப் படிப்பது? Hindu, IBN, India-today, rediff, india-glitz, thatstamil, சுப்பன் blog, குப்பன் blog ... அப்பப்பா!! இதுக்கு தீர்வு தான் RSS.

ஒவ்வொரு இணையதளத்திற்கும் போய் போய் படிக்கறதுக்குப் பதிலாக, அந்த தளங்களை உங்களுக்கு செய்திகளை அனுப்பச் சொன்னா என்ன? அது தான் idea இங்கே! கம்ப்யூட்டர் காலத்திற்கு முன்னாடி, Hindu-வும் Express-உம், நம்ம வீட்டு வாசலில் வந்து விழுமே!? நாம என்ன Hindu ஆபீஸுக்கும், Express ஆபீஸுக்கும், ஓடி ஓடியா நி்யூஸ் படிச்சோம்??! அதே மாதிரி, e-publishing முறையை வாசகர்களுக்கு வசதியாக மாத்தினது தான் இந்த RSS.

சரி, அதுக்கு வாசகர்கள் என்ன செய்யனும்?
ஒரு விஷயம் புதுசா பழகிக்கனும். எப்படி தினம் பல் விளக்குறோமோ, அடிக்கடி email check பண்றோமோ, அது மாதிரி "RSS reader" என்பதையும் அடிக்கடி check பண்ணிக்க பழகிக்கனும். போச்சுடா!-ன்னு சலிச்சுக்க வேணாம். RSS இனி போகாது. அது நம்ம செளகரியத்துக்குத் தான். அதனால் பழகுறது அவசியம்.

உதாரணத்திற்கு, http://www.google.com/reader/ என்ற தளத்தில் ஒரு RSS-reader கிடைக்கிறது. (உங்களுக்கு பிடிச்ச வேறு கம்பெனியின் ரீடரையும் நீங்க use பண்ணலாம்) மேலே உள்ள link-ஐ சொடுக்கி, account setup செய்து கொண்டால், அடுத்த முறை
போன்ற படங்களை உங்களது அபிமான தளங்களில் பார்க்கும் போது, அந்த படங்களின் மேல் சொடுக்கினால், அந்த தளத்தின் செய்திகளுக்கு உங்களை வாசகராக subscribe செய்து கொள்வீர்கள். அதான், வீட்டிலிருந்த படியே ஒரு ஃபோன் போட்டு, “அடே அம்பி! நாளைலேர்ந்து தினத்தந்தி போடுடாப்பா”ன்னு சொல்றது மாதிரி. இது மாதிரி subscription செய்த பின்பு, நீங்க செய்ய வேண்டியதெல்லாம், ஒன்னே ஒன்னு.

எப்போது news படிக்கனுமோ, அப்பப்போ http://www.google.com/reader/ அங்கே போனாப் போதும். பல வித தளங்களுக்குப் போய் எது புதுசு, எது பழசுன்னு தெரியாம குழம்பிப் போய் நேரம் விரயம் ஆவதைத் தவிர்க்கலாம்.

டா வின்சி - மாக்கியவெல்லி

2008-08-24T16:39:00.000-07:00

லியோனார்டோ டா வின்சி - மாக்கியவெல்லி
(Leonardo da Vinci - Niccolo Machiavelli)

லியோனார்டோ மென்மையான குணம் படைத்தவர். மாக்கியவெல்லி தந்திரமான சானக்கியர். லியோனார்டோ டா வின்சியும், மாக்கியவெல்லியும் சந்தித்துப் பேசியவைகள் எதுவும் வரலாற்றில் குறிப்பாக எங்குமே பதிவு செய்யப்படவில்லை. அதனால், இந்தப் பதிவு, அந்த சந்திப்பையும், அதன் சூழலில் நடந்தவைகளையும் வைத்தே எழுதப்பட்டிருக்கும் ஒரு செய்தித் துணுக்கு மட்டுமே.

இத்தாலியில் ராணுவப் படைத்தலைவனாக இருந்த புத்திசாலியும் கொடுங்கோலனுமாகிய செஸாரே பார்கியா (Cesare Borgia) என்பவன் இதில் முக்கிய இடம் பெறுகிறான். அவன் தனது அண்டை அரசுகளிடம் இருந்து தனது மானிலங்கள் அடி உதை வாங்காமல் இருப்பதற்கு, அன்று பெயர் போன ராணுவ பொறியாளர் லியோனார்டோவிடம் போகிறான். லியோனார்டோவுக்கும், பார்கியாவின் உதவியினால் பல இடங்களுக்கு தடையில்லாமல் சென்று வருவதும், ஆராய்ச்சி செய்வதும் வசதியாக இருந்தது. ஆனாலும், வின்சியின் மென்மையான அணுகுமுறையும், பார்கியாவின் சர்வாதிகாரமும் ஒத்துப் போகாது என்பது வின்சிக்கு அன்றே தெரிந்திருக்கும்.

கால்வாய் கட்டுவது, கோட்டை கட்டுவது, அணை எழுப்புவது என்று பல்வேறு விஷயங்களில் மும்முரமாக இருந்த வின்சி, மறுமலர்ச்சியின் (Renaissance) முக்கிய நபர்களுள் ஒருவரான எழுத்தாளனும்/அரசியல்வாதியுமான மாக்கியவெல்லியை சந்திக்க நேர்கிறது. லியோனார்டோவுக்கும், மாக்கியவெல்லிக்கும் நட்புறவு நீடிக்கிறது. அப்போது, மாக்கியவெல்லி பார்கியாவின் ராணுவத்தில் வேலை செய்கிறான். Imola-வில் இம்மூவரும் நீண்ட விவாதங்கள் செய்திருக்கக்கூடும். ஆனால் விவாதம் பதிவாகவில்லையென்றாலும், இந்நாட்களில் பார்கியாவின் ஆட்சியில் நடந்த கொடுமைகளை, லியோனார்டோ நேருக்கு நேர் பார்க்க நேரிட்டது.

இந்தக் காலத்திற்குப் பின், வின்சி பார்கியாவை விட்டுப் பிரிகிறார். அவரது நாட்குறிப்பில் (diary) பார்கியாவை விட்டு வந்த காரணத்தைப் பற்றி எதுவும் குறிப்பிடவில்லை. ஆனால், ஃப்ளாரன்ஸ் (Florence) வந்ததும் தன் வங்கியில் இருந்து பணம் எடுத்திருப்பதை வைத்து, பார்கியா-லியோனார்டோ பிரிவு பணம் எதுவும் வாங்காத, சுமூகமற்ற பிரிவாக இருப்பதாக அனுமானிக்கலாம்.

ஃப்ளாரன்ஸ் வந்ததும், அந்த அரசுக்கு உடனே வேலை செய்யத் துவங்கினார் வின்சி. ஆர்னொ நதியை பீசா நகரத்திற்குப் போகாமல் திருப்பி விடுவது, அதன் மூலம் அந்த நகரத்தை வழிக்கு கொணர்வது, ஒரு சிறந்த போர் உத்தியாக இருக்குமென ஆலோசனை கூறுகிறார். ரத்தம் தவிர்க்கலாம் என்பது அவர் வாதம். இந்த ஆலோசனைக்கு மாக்கியவெல்லியின் பெரும் ஆதரவு கிடைக்கிறது. ஆனாலும், இந்த வேலை துவங்கி 6 மாதங்களுக்குப் பிறகு வெள்ளம், ஆட்கள் பற்றாக்குறை காரணமாக கைவிடப்படுகிறது.

மேலும், நீர்மூழ்கிப் படைகளுக்கான யோசனைகளும் லியோனார்டோவின் குறிப்புக்களில் காணப்படுகிறது. அதிலும், சில தீவிரமான சிந்தனைகளை (உணவில்லாமல் நெடுநாள் நீருக்கடியில் இருப்பதற்கான சாத்தியங்கள் பற்றி) ரகசியமாக யாருக்கும் சொல்லாமல் வைத்திருக்கிறார். மனித இனம் அவைகளை அழிவிற்கு அதிகமாக பயன்படுத்தும் என்று சந்தேகிக்கிறார்!!

Source: "The Science of Leonardo" by Fritjof Capra

தாகூர் - காந்தி (I)

2008-07-23T18:08:00.002-07:00

தாகூர் - காந்தி (1921)
காந்தியடிகளின் ஒத்துழையாமை இயக்கத்தை விமர்சித்தவர் கவிஞர் தாகூர். உடுத்த உடையில்லாதவன், அன்னிய துணிகளை எரிப்பதில் உடன்பாடில்லாதவர் தாகூர். அறிவியலை அசிங்கம் என்றும், அழிவுக்கு வழி என்றும் பார்ப்பதைச் சாடியவர் தாகூர்! அறிவியலை அரவணைக்க கூக்குரலிட்டவர்.
அப்போது ஒரு முக்கியமான சந்திப்பு 1921 செப்டெம்பர் மாதம் தாகூரின் வீட்டில் நிகழ்ந்தது. காந்தியடிகள் தனது ஸ்வராஜ் இயக்கத்திற்கு வருமாறு தாகூரை கேட்டுக்கொண்டார். அந்த உரையாடல் அப்போது பத்திரிகைகளில் வெளிவரவில்லை. சுயசரிதைகளிலும், மற்றவரிடம் (Leonard Elmhurst) தாகூர் பின்னால் பகிர்ந்து கொண்ட பின்னும், மெதுவாக வெளிவந்த உரையாடல் இது.

காந்திஜி: குருதேவ், நீங்களே இருபது வருடங்கள் முன்பு ஒரு தலைவராகவும், ஸ்வதேஷி இயக்கத்தை முன்னின்று வழிநடத்துபவராகவும் இருந்தவர் தானே. இந்தியர்கள் தங்கள் சொந்தக் காலில் நிற்க வேண்டும், மேலை நாடுகளை குருட்டுத் தனமாக பின்பற்றுதல் (காப்பியடித்தல்) கூடாது என்று நீங்கள் எப்போதுமே சொல்பவர் தானே! என்னுடைய 'ஸ்வராஜ்' இயக்கம் உங்களின் 'ஸ்வதேஷி' இயக்கத்தின் வழி வந்த ஒரு இயக்கம் தான். என்னோடு சேர்ந்து சுயராஜ்ஜியத்திற்காகப் போராடுங்கள். வாருங்கள்.

தாகூர்: காந்திஜி, இன்று உலகம் முழுவதும் "தேசியம்"(Nationalism) என்னும் கிட்டப்பார்வையோடு ஒரு சடங்கு தலை விரித்தாடுகிறது. இந்தியா, தனது வரலாற்றில், அனைத்து கலாச்சாரத்தையும் வரவேற்று, ஏற்றுக் கொண்டது. இந்தியர்களாகிய நாம், மேற்கிலிருந்து நிறைய கற்றுக் கொள்ள வேண்டியது மட்டுமில்லாமல், பங்களிப்பதற்கும் நம்மிடம் நிறைய இருக்கிறது என்று நான் நம்புகிறேன். மேலை நாட்டு விஷயங்கள் அனைத்தையும் புறக்கணிப்பது என்பது சரியல்ல. (மேலை நாடுகளின் சிந்தனைகளையும், சாதனைகளையும் பார்ப்பது, இந்தியர்களாகிய நாம் நமக்குள் சேர்ந்து வாழ ஏதுவாக இருக்கும்)

காந்திஜி: குருதேவ், நான் ஏற்கனவே ஹிந்து-முஸ்லிம் ஒற்றுமையை அடைந்து விட்டேன்.

தாகூர்: வெள்ளையர்களை விரட்டியதும், அல்லது அவர்கள் வெளியேறியதும், என்ன நடக்கும் காந்திஜி? ஹிந்துவும், முஸ்லிமும் ஒற்றுமையாக அமைதியாக உட்கார்ந்திருப்பார்கள் என்கிறீர்களா? அது நடக்காது என்பது உங்களுக்குத் தெரியும்!

காந்திஜி: ஆனால், குருதேவ், என் இயக்கத்தின் பாதையே அஹிம்ஸையை அடிப்படையாகக் கொண்டுள்ளது. அதனால் தான், அமைதியை விரும்பும் கவியை என் இயக்கதிற்கு உழைக்க அழைக்கிறேன்!

தாகூர்: வாருங்கள், முற்றத்திற்கு வந்து பாருங்கள், காந்திஜி. உங்கள் அஹிம்ஸா புத்திரர்கள் செய்யும் செயல் அதோ! (சந்தையில் இருந்து, அயல்நாட்டுத் துணிகளைத் திருடி, நெருப்புப் பற்ற வைத்து ஒரு ஆர்ப்பாட்டம் தெருவில் நடக்கிறது) நீங்களே பாருங்கள்! இதுவா, அஹிம்ஸை!? உங்களுக்கே தெரியும், இந்தியர்களாகிய நாம் அதிகம் உணர்ச்சி வசப்படுபவர்கள். நம்முடைய தீவிர வன்முறை உணர்ச்சிகளை உங்களுடைய அஹிம்ஸை மூலம் கட்டுப்படுத்த முடியுமா?? முடியாது! உங்களுக்கும் தெரியும், அது முடியாது!! வெவேறு ஜாதி, இன, மத குழந்தைகளை ஒன்றாக கல்வித்து, அதன் பின்னரே இன்றைய வன்முறை உணர்ச்சிகளைக் களைந்தெறிதலை எதிர்பார்க்க முடியும்!

காந்திஜி: நூற்றுக் கணக்கான ஆசிரியர்களும், மாணாக்கர்களும், என் அறிவுறையின் பேரில், அரசாங்கக் கல்லூரியை விட்டு, என் (நாட்டின்) கல்வித் திட்டத்தில் சேர்ந்து வருகிறார்கள்.

தாகூர்: ஆம்! ஆனால், நீங்கள் முதலில் புத்திசாலியான இளைஞர்களைத் தேர்ந்தெடுத்து உங்கள் அரசியல் இயக்கத்தில் சேர்த்து விடுவதை, நான் பார்க்கிறேன். சராசரியானவர்களை, தாங்களே பள்ளிகள் தொடங்குமாறு விடுகிறீர்கள்! இது ஒரு மிகப்பெரிய கல்விச் சீர்கேட்டில் தான் வந்து முடியும்!
(மேலும், பொருளை (substance) விட்டு விட்டு குறியீட்டை (symbolism) வைத்து [தவறாக] மக்களைக் கையாள்வதாக, காந்தியைக் குற்றம் சாட்டினார் தாகூர்)

காந்திஜி: ஆனால், இந்தியர்கள், இயற்கையாகவே எப்போதுமே குறியீடுகளையும், படங்களையும் வணங்குபவர்கள் தானே? பொருளாதாரத் தவறுகளைச் சுட்டிக் காட்டும் போது, (நமக்கு உடுத்த உடையே இல்லாத போதும்)அன்னியத் துணிகள் அசுத்தமானவை, எரித்து விடுங்கள் என்று சொல்வது தவறில்லை!
(தாகூர், இவைகளை அவமானமாகக் கருதினார்)

காந்திஜி: சரி. என்னுடைய வேண்டுகோளில் பயனிருப்பதாகத் தெரியவில்லை. உங்களால் ஒன்றும் செய்ய முடியவில்லை என்றாலும், குருதேவ், உங்களால் கைராட்டினத்தை சுற்ற முடியும். உங்களின் மாணாக்கர்களை ஒன்று திரட்டி, உங்களை சுற்றி அமரச் செய்து, தறி நெய்தால் என்ன?
(இருவரும் சிரிக்கிறார்கள்)

தாகூர்: என்னால் கவிதைகளை நெய்ய முடியும், காந்திஜி! நான் பாடல்களும், நாடகங்களும் நெய்ய முடியும். உங்கள் மதிப்புள்ள பஞ்சிலிருந்து நான் நூல் நெய்தால், அதை சீர் குலைத்து விடுவேனே!!

இந்த சந்திப்பிற்குப் பிறகு, தாகூர் "உண்மையின் அழைப்பு" (Call of Truth) என்ற கட்டுரை எழுதினார். அதற்கு காந்திஜி "தி க்ரேட் சென்டினெல்" (The Great Sentinel) என்ற பதில் கட்டுரை எழுதினார். 1961 -ஆம் ஆண்டு, பண்டிட் நேரு இதைப் பற்றி கூறுகையில், "அந்த இரண்டு பார்வைகளுமே உண்மையின் இரு வடிவங்கள். எந்த ஒன்றை மட்டுமோ புறக்கணிக்க முடியாது" என்று கூறினார்.

மற்றுமொரு உரையாடல், பீஹார் பூகம்பத்திற்குப் பின் நடந்தது. அப்போது காந்திஜி விடுத்த அறிக்கை நேருவை அதிர்ச்சிக்குள்ளாக்கியது! தாகூரை ஏமாற்றம் கொள்ளச் செய்தது. இந்தியர்களின் தீண்டாமை என்னும் பாவப் பழக்கத்தினால் தான் பூகம்பம் நிகழ்கிறது என்ற காந்திஜியின் அறிக்கையே அது!!
----------------------------------------
[Source: Rabindranath Tagore, The Myriad-Minded Man, by Krishna Dutta & Andrew Robinson]

க்ரிஷ்னா அய்யர் - கே.ஆர். நாராயணன்

2008-07-20T02:17:00.000-07:00

இந்திய அரசாங்கம், க்ரிஷ்னா அய்யருக்கு பத்ம விபூஷன் விருது கொடுக்க முடிவு செய்து, அவரை தனிப்பட்ட முறையில் அணுகி செய்தியைச் சொல்கிறது. அதாவது, பொதுவில் சொல்வதற்கு முன்னால் இப்படி தனியே கூப்பிட்டு சொல்லி, அவர்கள் சம்மதத்தைக் கேட்டு விடுவது வழக்கம். இல்லேன்னா, விருது கொடுக்கறோமுன்னு பொதுவில் சொன்ன பிறகு 'வேண்டாம் போடா'ன்னு சொல்லிட்டா "பத்ம விபூஷன் விருது"க்கு இழுக்கு, இல்லையா!
செய்தி கேட்டதும் என்ன செய்தார் இவர் தெரியுமா? உடனே ஜனாதிபதி கே.ஆர்.நாராயணனுக்கு போட்டார் ஒரு ஃபோன்! ஜனாதிபதியிடம், இந்த விருது வாங்குவதால் என்ன கடமை (அல்லது பாரம்) வருகிறதுன்னு கேட்டிருக்கார். குறிப்பா, விருது வாங்கிட்டேங்கிறதால, நாளைக்கு அரசாங்கத்தையோ, அதன் கிளைகளையோ விமர்சனம் பண்ணுவது முறையில்லைன்னு ஏதாவது இங்கிதங்கள் இருக்குதான்னு கேட்டிருக்கார்! நாராயணனும் உடனே, 'நோ நோ... உங்களுக்கு இருக்கும் அந்த அடிப்படை உரிமையில், இந்த விருது (வாங்குவது) எப்பவும் குறுக்கே நிற்காது. கவலையை விடுங்கள்' அப்படீன்னு சொல்லியிருக்கார். அதுக்கப்புறம் தான், 'சரிப்பா, கொடுங்க வாங்கிக்கறேன்'னு விருதை ஏத்துக்குட்டாறாம் மனுஷன்.
அடுத்தவர்களுக்கு கூஜா தூக்கும் இன்றைய அரசியல் சூழலில், இப்படியும் மனிதர்கள் இருந்திருக்கிறார்கள். தங்கள் பேச்சு உரிமையை விருதுக்கும் விட்டுக் கொடுக்கக் கூடாது என்று இருந்திருக்கிறார்கள். குழந்தைகளுக்கு சொல்ல வேண்டிய முக்கியமான உத்வேக துணுக்கு கதை இது.

காந்தி - பெரியார்

2008-07-13T08:45:00.000-07:00

26 - 12 - 1929, சிங்கப்பூரில் நடந்த மலேய இந்திய சங்க மாநாடு ஒன்றிற்கு ஈ.வே.ரா அழைக்கப்பட்டிருக்கிறார். அப்போது, மேயோ என்ற ஆங்கிலப் பெண்மணி எழுதிய, இந்தியாவைப் பற்றிய ஒரு புத்தகம் சர்ச்சையைக் கிளப்பியபடி இருந்தது. அந்தப்புத்தகத்தைப் பற்றி காந்திஜி மற்று பலர் பல எதிர்வினைகளும், பதில்களும் கொடுத்தபடி இருந்தனர். பொதுக்கூட்டங்களில் கேள்வி நேரங்களில் இதைப்பற்றி கேட்பது வழக்கம்.

பெரியார் பேசிய போது, மேயோ எழுதியிருக்கும் புத்தகத்தை (இந்தியாவில் ஊழல்களை பற்றி) குறிப்பிட்டார். அத்தகைய ஊழல்களையெல்லாம் போக்குவது தன் சுய மரியாதை இயக்கத்தின் நோக்கம் என்று சொல்லிக்கொண்டு வந்தார். அப்போது பார்வையாளார் கேட்கும் கேள்விக்கு பெரியாரின் பதில்:

கேள்வி: மேயோ எழுதியதன் கருத்து என்ன?

பெரியார்: கருத்து என்ன என்பதை நாம் பிறகு கவனிப்போம். அந்தம்மாள் எழுதியிருப்பவை உண்மையா? பொய்யா? என்று நாம் முதலில் பார்க்க வேண்டும்.

கேள்வி: காந்தியார் அந்தம்மாளைச் "சாக்கடைப் பரிசோதனை" என்று சொல்லியிருக்கிறாரே?

பெரியார்: திரு காந்தியார், சாக்கடைப் பரிசோதனை என்று சொல்லியது உண்மையாயிருந்தாலும், சாக்கடை இல்லாத இடத்தையாவது, சிங்கார வனத்தையாவது காட்டி, அவற்றைப் பார்க்க அந்தம்மாளைக் கூப்பிட்டிருக்கலாம். அப்படிக் காட்டுவதற்கு ஆதாரமில்லாததால்தான் காந்தியார் இந்தியர்களைப் பார்த்து, "மேயோ எழுதிய புத்தகத்தை மறந்து விடாமல் எப்பொழுதும் ஒரு பக்கத்தில் வைத்திருங்கள்" என்று சொல்லியிருக்கிறார். இதன் கருத்து சாக்கடையைச் சுத்தம் செய்யுங்கள் என்பதேயாகும்.

கேள்வி: வேறு பலர் மறுப்பு எழுதியிருக்கிறார்களே?

பெரியார்: மேயோ சொன்னவற்றை யாரும் முழுதும் மறுக்கவில்லை. மிஸ் மேயோ நாட்டிலும் இவ்விதம் இல்லையா என்று தான் எழுதியிருக்கிறார்கள். நீ மாத்திரம் யோக்கியனா என்றால், இதற்குப் பெயர் மறுப்பு ஆகுமா? ஒப்புக் கொள்வதாகும்.

இவ்வாறு அவர் கேள்விகளுக்கு விடை கூறி, மேயோ கூற்று ஒவ்வொன்றையும் எடுத்துக்காட்டிப் பேசினார். கேள்வி கேட்டவர் வெட்கமடைந்தார்.

தாகூர் - ஐன்ஸ்டீன் சந்திப்பு

2008-07-05T23:55:00.000-07:00

14 ஜூலை 1930 ஆண்டு, பெர்லின் சென்று அங்கு ஐன்ஸ்டீனை சந்திக்கிறார் ரவீந்திரனாத் தாகூர். அக்காலத்தில், இருவரும் 'நோபெல்' பரிசு வாங்கி உலகளவில் புகழ் பெற்றிருந்தனர். ஐன்ஸ்டீன் ஒரு அறிவியலார். தாகூர் ஒரு கலைஞர்.

தாகூர்:
டாக்டர் மென்டலுடன் இன்று புதிய கணித கண்டுபிடிப்புக்கள் பற்றி பேசியபோது, நுண்ணிய அணு அளவில் பார்க்கையில், நிகழ்தகவு/வாய்ப்புமுறையே விளையாடுகிறது என்று கண்டோம். வாழ்க்கை நாடகம் என்பது நிபந்தனையற்ற முன் -நியதிக்குட்பட்டவை அல்ல! (No absolute predestination)

ஐன்ஸ்டீன்:
கண்டுபிடிப்புக்கள் அறிவியலை இந்தக் கண்ணோட்டத்தின் பக்கம் சாய்த்தாலும், காரணச் செயல்பாடு, செயல்விளைவு (causality) என்பதை தூக்கி எறிந்து விட முடியாது.

தாகூர்:
இருக்கலாம். ஆனாலும், கூறுகளில் செயல்விளைவு இல்லாதது போலும்(Causality appears to be absent in the atomic scale), வேறு ஏதோ சக்தியின் உருவாக்கத்தில் ஒரு ஒழுங்குமுறைப் படுத்தப்பட்ட அண்டம் வந்தது போலும் தெரிகிறது.

ஐன்ஸ்டீன்:
மேல்தட்டில் இந்த ஒழுங்குமுறை புரிந்து கொள்ளப்படுகிறது. நுண்ணிய கூறுகளில், உணர முடிவதில்லை. (The order is not perceptible)

தாகூர்:
ஆக, இருப்பின் ஆழத்தில் இருமையியல்பு (Duality), ஒரு முரண்பாடு இருக்கிறது.

ஐன்ஸ்டீன்:
நவீன அறிவியல் இதை முரண்பாடு என்று சொல்லாது. மேக மூட்டங்கள் தொலைவில் இருந்து பார்க்கும்போது, ஒரு வடிவமாக தெரிந்தாலும், அருகே சென்று பார்த்தால் தன்னை ஒழுங்கற்ற நீர்த்துளிகளாகத் தான் காட்டிக்கொள்கிறது.

மு.க. - ஜெயகாந்தன் (பழைய) சந்திப்பு

2008-06-29T15:50:00.000-07:00

ஜெயகாந்தனும் மு.கருணாநிதியும் செய்த (பழைய) உரையாடலை இங்கு பதிவு செய்கிறேன்

மு.க:
நமது இந்திய அரசாங்கத்தின் மது விலக்கு கொள்கையை எடுத்துக் கொள்வோம். மது விலக்கு தேவையா இல்லையா என்ற விவாதத்தில் நாம் இறங்க வேண்டாம். ஆனால், அது இந்தியா முழுவதும் ஒரே மாதிரியானதாய் அமைய வேண்டும். சமத்துவமான நெறிமுறைகள் வேண்டும். அந்த விஷயத்தில் கூட இங்கே மாநிலங்களுக்கிடையே பேதங்கள் நிலவுகின்றன. இது சரியல்ல என்று கருதுகிறேன்.

ஜெ.கா:
உண்மையில் இவ்வளவு கடுமையான மதுவிலக்குச் சட்டங்களை யாருடைய நிர்பந்தத்தில் நம் மீது திணிக்கிறார்கள் என்று நினைக்கிறீர்கள்?

மு.க:
சந்தேகமே வேண்டாம். கள்ளச்சாராயக் காரர்களின் நிர்பந்தம் தான். மது விலக்கு இல்லாதிருந்தால் அரசாங்கத்துக்குப் பணம் கிடைக்கும். மது விலக்கை அமுல் படுத்தினால் ஆளுங்கட்சிகாரர்களின் புரவலர்களான சாராய வியாபாரிகளுக்கு லாபமாகவும், போலீஸ்காரர்களுக்கு மாமூலாகவும் நிறைய சம்பாதிக்க முடிகிறது அல்லவா?

ஜெ.கா:
நீங்களும் தானே மதுவிலக்கை அமுல் படுத்தினீர்கள்?

மு.க:
காமராஜரைப் போன்ற பெரிய தலைவர்கள் வற்புறுத்தியதனால், அதற்காக தி.மு.க.வின் மீது அபவாதங்களை கூறி மக்கள் மத்தியில் தொடர்ந்து எதிர்ப்பை உருவாக்கியதால், நான் மதுவிலக்கை மறுபடியும் கொணர நேர்ந்தது. இந்தியா முழுவதும் மதுவிலக்கு அமல்படுத்துவது வெற்றி தராது என்பது என் கருத்து.

ஜெ.கா:
நான் அது விஷயத்தில் காமராஜரின் விமர்சனங்களை அப்போதே ஏற்கவில்லை. ஆனால் மதுவிலக்கு இல்லாத போது விற்பனையிலும் வினியோகத்திலும் சில வரைமுறைகளையும் கட்டு திட்டங்களையும் ஏற்படுத்துவது அவசியம். நீங்கள் சட்டம் போட்டு விட்டீர்கள் என்பதற்காக, தண்டித்து விடுவீர்கள் என்பதற்காக பயந்து கொண்டு ஒரு கோழை போல் நான் குடிக்காமல் இருக்க வேண்டுமென்று விரும்புவீர்களா? என்னைப் போன்றவர்களைக் குற்றவாளியாக்குவதும், கோழையாக்குவதும்தான் சட்டத்தின் நோக்கமா?

மு.க: (வாய் விட்டுச் சிரிக்கிறார்)
ஜெயகாந்தனின் வாதங்கள் சுவையானவை. சிந்திக்கத் தூண்டுபவை. ஆனாலும், அவற்றோடு என் கருத்துக்களை இணைத்துவிட வேண்டாம்.

ஜெ.கா:
இந்த விஷயத்தில் நாட்டுப் பிரஜை வேறு; நாடாள்வோர் வேறு என்று பாகுபாடு செய்வது தவறு என்பது என் கருத்து.

மு.க:
ஆமாம். இந்தத் தீவிரமான புதிய மதுவிலக்குச் சட்டம் குறித்து நான் முரசொலியில் எழுதியிருக்கிறேன். சென்னையில் எல்லாப் பகுதியிலும் தாராளமாய் மது வியாபாரம் நடக்கிறது. முன்பு 10 ரூபாய் மாமூல் கிடைத்த போலீஸுக்கு இப்போது 100 ரூபாய் கிடைக்கிறது.

ஜெ.கா:
இந்திரா காந்தியைக் கொல்ல முயன்றதாக உங்கள் மீது ஒரு குற்றச் சாட்டும், வழக்கும் இருக்கிறது அல்லவா? அது குறித்து ஏதேனும் சொல்லலாமா?

மு.க:
என்ன சொல்வது? சிரிப்புதான் வருகிறது. என்மீது இப்படி ஒரு குற்றச்சாட்டை இந்திராகாந்தியே ஒப்புக்கொள்ளமாட்டார் என்று தான் நம்புகிறேன்.

ஜெ.கா:
இது மாதிரியான பொருத்தமற்ற, அபத்தமான, அநியாயமான குற்றச்சாட்டுகளைத் தள்ளுபடி செய்து சம்பந்தப்பட்டோருக்குப் புத்திமதி சொல்லுகிற நீதிமன்றங்கள் வேண்டும். அப்போது தான் உண்மையிலேயே நமது நீதி மன்றங்களின் சுதந்திரத்தை மக்கள் நம்புவர்.(இது விஷயம் வழக்கு சம்பந்தப்பட்டிருப்பதால் திரு மு.க. மெளனமான புன்னகையோடு தமது கருத்து உடன்பாட்டைத் தெரிவிக்கிறார்)

இவர்கள் பேசியது...

2008-06-29T15:46:00.000-07:00

ஒவ்வொரு சித்தாந்தமும் "தன் பார்வை சரியே" என்ற ரீதியில் தான் இயங்குகிறது. ஆனாலும், எதிர்மறையான சித்தாந்தங்கள் இரண்டும் ஒரே நேரத்தில் சரியாக இருக்க முடியாது என்பது பொது அறிவு. ஆனாலும், இவைகளுக்கு நடுவே நடக்கும் சமரசத்தில் தான் சமூக/அரசியல்/கலை வாழ்க்கை ஓடுகிறது. இணையதளங்களில் மக்களின் வாதங்கள் சூடாக நடப்பதும் இதனால் தான்.

ஆனால், பொதுவாக விவாதங்களில், பேசிய விஷயங்களையே பேசிக்கொண்டிருப்பது சலிப்பு தட்டிவிடும். அல்லது வாதங்கள் அர்த்தம் இழந்து விடும். இதில் சிக்கி, கால விரயம் செய்வதை தவிர்ப்பதற்கு ஒரு வழி உண்டு. சித்தாந்தங்களைப் பற்றி, அதில் அதிகம் விவரம் தெரிந்தவர்களை நேரடியாகக் கேட்டு/படித்து அறிந்து கொள்வது. இது தெரிந்த விஷயம் தான்.

எனக்கு சுவாரசியம் தரும் விஷயம் என்னவென்பதை சொல்லி விடுகிறேன். சித்தாந்தங்களை கறைத்துக் குடித்து விளக்கம் சொல்லக் கூடிய இருவர், அதாவது எதிர்மறை கருத்துக் கொண்டிருக்கும் இரு பெரியவர்கள்/தலைவர்கள்/அறிஞர்கள் போன்றவர்களைப் பேச வைத்து பார்க்கும் போது உள்ள சுவையே தனி. நமக்குள் தோன்றும், நாம் கேட்க நினைக்கும் கேள்விகளை அவர்கள் ஒருவருக்கொருவர் கேட்டுக் கொள்வர். அதாவது, ஒரு தலை பட்ச "போதனைகள்" இருக்காது. இன்டெராக்ஷன் இருக்கும்.

ஆக, அப்படிப் பட்டவர்கள் பேசிக்கொண்டதை பகிர்ந்து கொள்ளலாம் என்று எனக்கு ஆசை. பார்க்கலாம்.

உதாரணம்: காந்தியின் போராட்டத்தை பற்றி தாகூர் செய்த விமர்சனங்களும், அதற்கு காந்தி கொடுத்த பதில்களும் வரலாற்றில் சுவையானவை. கிடைத்தால், இங்கு பதிவு செய்கிறேன்.

கமலஹாசன் - சமர்ப்பனம்

2008-06-28T13:56:00.000-07:00

இதப் பார்றா!!
கமலஹாசனுக்கு, அவர் விசிறிகள் சேர்ந்து ஒரு சமர்ப்பனம் செய்துள்ளனர். பரவாயில்லை, நல்லாவே வந்திருக்கு.
”கடவுள் பாதி ...” வசனத்தை தேர்வு செய்திருப்பது ஜாலி தான். :-) ஆளவந்தான் படத்தை மறக்க விட மாட்டாங்க போலிருக்குது.

டாக்டர் ஷாலினியின் இணைய தளம்

2008-06-28T01:58:00.000-07:00

அவரின் இணையதளம் இங்கே ... இங்கே

டாக்டர் ஷாலினி பேசுகிறார்

2008-06-28T00:25:00.000-07:00

டாக்டர் ஷாலினி பேசுகிறார் (குமுதம் ஞானி பேசுகிறேன் நிகழ்ச்சியில் )

பேட்டி இதோ. (ஈமெயில் லாகின் செய்து பார்க்கவும்)

சுவாரசியம் நிறைந்த பேட்டி.
மெதுவாக, ஆனாலும் அழுத்தமான கேள்விகளுடன், தொடங்குகிறது. பின்னர், கல்லூரி ragging பற்றியும், தொழிலில் பெண்களை வேறுபடுத்திப் பார்க்கும் கொடுமை பற்றியும் யதார்த்தமாக சொல்லியபடி தாண்டிப் போகிறார் ஷாலினி!
மனித மூளை பற்றி விளக்கம் கொடுத்த போது, அருமையாக நிறுத்தி கேள்வி கேட்கிறார் ஞானி.

M.Tech கணவன் M.Tech மனைவி போன்ற ஜோடிகள் வந்தாலும் "மனைவி என் பேச்ச கேட்க மாட்டேன்னு சொல்றா" "பெண் மாதிரி இருக்க மாட்டா " .... இப்படி வருத்தங்கள் தானாம் !! கொஞ்சம் சத்தமா, இந்தியா முழுக்க கேட்கும்படி சொன்னால் உபயோகமா இருக்கும். ஆண்களை (பெண்களையும்) சுயமா யோசிக்க வச்சா மாற்றம் நிகழுதுன்னு ஷாலினி சொல்றத கேட்கும் போது மகிழ்ச்சி தான். ஐந்தாம் வகுப்பில் கத்துக்க வேண்டியத, அஞ்சு வயசு குழந்தைகள மடியில வச்சுக்கிட்டு கத்துக்க வேண்டியிருக்குது.

மாமியார் பிரச்னையை அருமையா சொல்றார் ஷாலினி.

"எனக்கு கிடச்ச புருஷன விட, நல்லா உதவி செய்யற (இந்த தலைமுறை) புருஷன் தன் மருமகளுக்கு கிடச்சிருக்கு. இதுக்கு மகிழ்ச்சி அடையும் மேன்மக்களை விட கோபப்படுபவர்கள் தான் அதிகம். Thats Reality! "

மேலும்

"மனசு கஷ்டமா இருந்தா, அதுக்கு ஆக்கபூர்வமா என்ன பண்றதுன்னு குழந்தைகள் யோசிக்கறதில்லை”

"Marriage is an artificial Institution. திருமணம் என்பது ஒரு செயற்கையான அமைப்பு."

என்று ”பளிச்” கருத்துக்களுடன் பேட்டி சுவாரசியம் அடைகிறது.

"மன நிலை மருத்துவம் என்பது சமூகத்தை conformism நோக்கி இட்டுச்செல்கிறது" என்ற கருத்தை வைத்து இன்னும் கொஞ்சம் தெளிவா பேசியிருக்கலாம். ஷாலினி "self-destructive behaviour" பத்தி முதலில் சொன்னதை வச்சு ஞானியின் அந்த கேள்விக்கு இன்னும் சிறப்பா பதில் சொல்லியிருக்கலாம்.

மன நிலை மருத்துவம், மரபு/கலாச்சாரம் இரண்டுக்கும் இருக்கும் தொடர்பு பத்தியும், மேலும் மேற்கத்திய கலாச்சார பாதிப்பு இந்த துறையில் இருப்பதை பத்தியும் பேச ஆரம்பிச்சு, ஆனால் அந்தத்தலைப்பை தொடாமலே சென்றுவிட்டார்கள். சின்ன ஏமாற்றம்.

அவசியம் பார்க்கவும். பார்த்து மகிழவும்.

வேட்டையாடு விளையாடு - 1

2008-06-28T00:09:00.000-07:00

ஆர்க்கா (Orca) என்னும் killer whale, நடத்தும் வேட்டை இது. அந்த Sealionஐ ப்பார்த்து நீங்கள் பரிதாபப்படுமுன், முழு வீடியோவையும் பார்த்து விடவும்!!

இரண்டு, மூன்று முயற்சிகளுக்குப் பின், மூன்று Orcas ஒன்றாக சேர்ந்து ஒரு கூட்டு முயற்சியில் பனிக்கட்டியை சரித்து இறையை அடைகின்றன. ஆனால்... இறுதியில் sealionஐத் திரும்பவும் பனிக்கட்டியில் சேர்த்துவிட்டுச் செல்கின்றன! ”குழந்தைகளுக்கு வேட்டைப் பயிற்சி தான் கொடுத்தோம்... பிழைத்துப் போ” என்று சொல்கின்றனவோ??